{"kind":"section","lang":"la","language":"Latin","title":"Optice 338","citation":"Newton, Optice 338","ref":"338","level":null,"urn":null,"url":"https://interlinea.aeterna-institute.org/library/latin/newton/optice/338","api":"https://interlinea.aeterna-institute.org/api/v1/library/latin/newton/optice/338","markdown":"https://interlinea.aeterna-institute.org/library/latin/newton/optice/338.md","author":{"name":"Newton","url":"https://interlinea.aeterna-institute.org/library/latin/newton"},"work":{"title":"Optice","url":"https://interlinea.aeterna-institute.org/library/latin/newton/optice","urn":null},"verse":false,"words":199,"text":"Quorum denique corporum siquod sit compactum, flectatque se, &, cum prematur, intro cedat, sine ullo partium suarum sublapsu; jam id corpus durum est & elasticum, revertens ad figuram suam Vi ea, quae ex mutua partium suarum attractione oritur. Si partes ejus, inter se sublabuntur; jam corpus id molle est, & Mallei ictibus cedens. Si partes facillime labantur, & magnitudine sint ea, qua Calore facile agitari queant: calorque satis magnus sit, ad eas agitandas; (licet multo fortasse minor, quam ad id opus est, ne Aqua congeletur;) jam corpus illud fluidum est: Et, si adhaerescendo aptum sit, appellatur humidum. Guttae autem corporis cujusque fluidi, ut Figuram globosam induere conentur, facit mutua partium suarum Attractio; eodem modo, quo Terrae Mariaque in rotunditatem undiqe conglobantur, partium suarum Attractione mutua, quae est Gravitas. Quandoquidem Metalla in Acidis dissoluta, parvam solummodo Acidi portionem ad se attrahunt; liquet Vim eorum attrahentem, non nisi ad parva circum intervalla pertingere. Et sicuti in Algebra, ubi Quantitates affirmativae evanescunt & desinunt, ibi negativae incipiunt: ita in Mechanicis, ubi Attractio definit, ibi Vis repellens succedere debet. Talis autem Vis aliqua ut sit, consequi videtur ex Reflexionibus & Inflexionibus Radiorum Lucis: Nam in utroque horum casuum, repelluntur Radii a corporibus, sine immediato contactu corporis reflectentis vel inflectentis.","prev":{"citation":"Optice 337","label":"337","url":"https://interlinea.aeterna-institute.org/library/latin/newton/optice/337","api":"https://interlinea.aeterna-institute.org/api/v1/library/latin/newton/optice/337"},"next":{"citation":"Optice 339","label":"339","url":"https://interlinea.aeterna-institute.org/library/latin/newton/optice/339","api":"https://interlinea.aeterna-institute.org/api/v1/library/latin/newton/optice/339"},"credit":{"text":"Newton (with Samuel Clarke), Optice. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://zenodo.org/records/15040256","quality":"ocr"}}