{"kind":"section","lang":"la","language":"Latin","title":"Optice 347","citation":"Newton, Optice 347","ref":"347","level":null,"urn":null,"url":"https://interlinea.aeterna-institute.org/library/latin/newton/optice/347","api":"https://interlinea.aeterna-institute.org/api/v1/library/latin/newton/optice/347","markdown":"https://interlinea.aeterna-institute.org/library/latin/newton/optice/347.md","author":{"name":"Newton","url":"https://interlinea.aeterna-institute.org/library/latin/newton"},"work":{"title":"Optice","url":"https://interlinea.aeterna-institute.org/library/latin/newton/optice","urn":null},"verse":false,"words":143,"text":"Quemadmodum in Mathematica, ita etiam in Phyfica, investigatio rerum difficilium ea Methodo, quae vocatur Analytica, semper antecedere debet eam quae appellatur Synthetica. Methodus Analytica est, experimenta capere, phaenomena observare; indeque ex rebus compositis, ratiocinatione colligere simplices: ex Motibus, vires moventes; & in universum, ex effectis, causas; ex causisque particularibus, generales; donec ad generalissimas tandem sit deventum. Methodus Synthetica est, causas investigatas & comprobatas assumere pro Principiis, eorumque ope explicare Phaenomena ex iisdem orta, istasque explicationes comprobare. In duobus prioribus Libris hujus Optices, Methodo Analytica usus sum ad investigandum & comprobandum congenitas Radiorum Luminis differentias, quoad refrangibilitatem, reflexibilitatem & calorem: eorumque alternas facilioris Reflexionis & facilioris Transmissus Vices; corporumque proprietates, tum opacorum tum pellucidorum, e quibus Reflexiones Coloresque Radiorum pendent: Atque haec quidem Inventa, quum sint comprobata, poterunt in Methodo Synthetica ut Principia afsumi, ad explicanda Phaenomena ex iisdem fluenia: Cujus porro Methodi exemplum dedi, sub finem Libri primi.","prev":{"citation":"Optice 346","label":"346","url":"https://interlinea.aeterna-institute.org/library/latin/newton/optice/346","api":"https://interlinea.aeterna-institute.org/api/v1/library/latin/newton/optice/346"},"next":{"citation":"Optice 348","label":"348","url":"https://interlinea.aeterna-institute.org/library/latin/newton/optice/348","api":"https://interlinea.aeterna-institute.org/api/v1/library/latin/newton/optice/348"},"credit":{"text":"Newton (with Samuel Clarke), Optice. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://zenodo.org/records/15040256","quality":"ocr"}}