{"kind":"section","lang":"la","language":"Latin","title":"Optice 43","citation":"Newton, Optice 43","ref":"43","level":null,"urn":null,"url":"https://interlinea.aeterna-institute.org/library/latin/newton/optice/43","api":"https://interlinea.aeterna-institute.org/api/v1/library/latin/newton/optice/43","markdown":"https://interlinea.aeterna-institute.org/library/latin/newton/optice/43.md","author":{"name":"Newton","url":"https://interlinea.aeterna-institute.org/library/latin/newton"},"work":{"title":"Optice","url":"https://interlinea.aeterna-institute.org/library/latin/newton/optice","urn":null},"verse":false,"words":316,"text":"Prisma, cujus bini Anguli ad Basim aequales inter se semirectique essent, tertius autem rectus; collocavi in Solis Luminis radio per fenestrae operculi foramen, sicuti in tertio supra Experimento dictum est, in Cubiculum tenebricosum transmisso. Conversoque lente circa Axem suum Prismate, donec id omne Lumen, quod initio per alterum Angulorum ejus transmissum in eoque Refractum fuerat, mox a Basi, qua usque adhuc e vitro exierat, Reflecti caeperit: Observabam radios, qui maxime Refracti fuissent, eosdem citius quam reliquos Reflecti. Quocirca mecum ita reputabam: Radiorum Reflexi Luminis, qui maxime essent Refrangibiles, eos omnium primos totali Reflexione copiosiores in isto Lumine quam reliquos adesse; reliquos autem deinceps, totali itidem Reflexione, aeque, ac hos, copiosos Refle cti. Ut hoc, utrum ita se haberet, necne, Experirer; Lumen Reflexum per aliud deinceps Prisma ita trajeci, ut in eo Refractum, incideret deinde in chartae albae plagulam post id Prisma interjecto aliquo intervallo collocatam, ibique, ut solet, colores Refractione depingeret. Tum converso circa Axem suum, uti supra dictum est. priori Prismate: Rem ita se habere comperi, ut cum Radii illi, qui in isto priori Prismate maxime Refracti fuissent, caeruleique & violacei visi essent, ex toto Reflecti caeperint; lumen super charta caeruleum & violaceum, quod itidem in secundo Prismate maxime Refractum fuerat, manifesto plus augeri videretur, quam rubeum & flavum quod minus Refractum fuerat: Et deinde, cum reliquum Lumen, quod erat viride, flavum, & rubeum, caeperit in primo Prismate in totum Reflecti; lumen itidem eorundem colorum super charta, accessionem sibi faceret non minorem, quam ante sibi fecissent caeruleum & violaceum. Ex quo apparet, Radium istum Luminis, Basi Prismatis reflexum, quum primo Radiorum maxime Refrangibilium, & deinde eorum qui fuerint minus Refrangibiles accessione auctus sit, utique Compositum esse ex Radiis diverse Refrangibilibus. Tale autem omne Reflexum Lumen, quin ejusdem plane naturae sit ac id quod directo e Sole fluxerat antequam in Basin Prismatis incideret, nemoest qui dubitet: Quippe in eo fere Omnes conveniunt, Lumen istiusmodi Reflexionibus nullam omnino Modificationum suarum Proprietatumve subire Immutationem.","prev":{"citation":"Optice 42","label":"42","url":"https://interlinea.aeterna-institute.org/library/latin/newton/optice/42","api":"https://interlinea.aeterna-institute.org/api/v1/library/latin/newton/optice/42"},"next":{"citation":"Optice 44","label":"44","url":"https://interlinea.aeterna-institute.org/library/latin/newton/optice/44","api":"https://interlinea.aeterna-institute.org/api/v1/library/latin/newton/optice/44"},"credit":{"text":"Newton (with Samuel Clarke), Optice. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://zenodo.org/records/15040256","quality":"ocr"}}