{"kind":"section","lang":"la","language":"Latin","title":"Optice 82","citation":"Newton, Optice 82","ref":"82","level":null,"urn":null,"url":"https://interlinea.aeterna-institute.org/library/latin/newton/optice/82","api":"https://interlinea.aeterna-institute.org/api/v1/library/latin/newton/optice/82","markdown":"https://interlinea.aeterna-institute.org/library/latin/newton/optice/82.md","author":{"name":"Newton","url":"https://interlinea.aeterna-institute.org/library/latin/newton"},"work":{"title":"Optice","url":"https://interlinea.aeterna-institute.org/library/latin/newton/optice","urn":null},"verse":false,"words":233,"text":"Quare horum Colorum Lumen, cum sit tanto rarius quam id quod intra circulum cadat; utique Sensum vix movere poterit: Praesertim cum color rubeus saturatior, & viridis saligneus, hujusce Luminis; colores sint multo, quam reliqui, fusciores. Eandem autem ob causam Colores Caeruleus & Violaceus, cum sint etiam adhuc multo, quam illi, obscuriores; multoque etiam magis rarefacti; omnino negligi poterunt. Etenim densum illud clarumque Lumen in Circulo inclusum, offundet obscurabitque rarum & languidum fusciorum horum Colorum circumjectorum lumen; efficietque ut hi Sensu percipi vix queant. Itaque Puncti lucidi Imago, quae Sensu percipi possit, vix excedet magnitudine Circulum, cujus Diameter sit 250ma pars diametri aperturae Vitri Objectivi Telescopii melioris: Saltem non multo latior eo erit; si excipias languidum, obscurum, nubilumque admodum circumfusum Lumen, cujus haud fere ullam habebit Spectator rationem. Proinde in Conspicillo tubulato, cujus apertura sit quatuor Unciarum, & Longitudo Pedum Centum; haec Imago non excedet 2 45', aut 3'. Et in Conspicillo tubulato, cujus apertura sit binarum Unciarum, & Longitudo 20 aut 30 Pedum; poterit esse 5' aut 6', vix autem major eoQuod quidem Experientiae optime congruit. Etenim Astronomi quidam, per Conspicilla tubulata supra vicenos Pedes, & infra sexagenos, longa; observarunt diametros Stellarum Fixarum, esse circiter 4' aut 5', aut summum 6'. Verum si Vitrum Ocularium, Facis Lychnive fumo leniter infuscatum sit, quo Lumen Stellae obscuretur; jam languidum illud Lumen, quod erat in Circuitu Stellae, evanescet; stellaque ipsa (si Vitrum satis sit Fumo infuscatum) ad puncti Mathematici similitudinem propius accedet.","prev":{"citation":"Optice 81","label":"PROP. VII. THEOR. VI","url":"https://interlinea.aeterna-institute.org/library/latin/newton/optice/81","api":"https://interlinea.aeterna-institute.org/api/v1/library/latin/newton/optice/81"},"next":{"citation":"Optice 83","label":"PROP. VII. THEOR. VI","url":"https://interlinea.aeterna-institute.org/library/latin/newton/optice/83","api":"https://interlinea.aeterna-institute.org/api/v1/library/latin/newton/optice/83"},"credit":{"text":"Newton (with Samuel Clarke), Optice. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://zenodo.org/records/15040256","quality":"ocr"}}