{"kind":"section","lang":"la","language":"Latin","title":"Optice 96","citation":"Newton, Optice 96","ref":"96","level":null,"urn":null,"url":"https://interlinea.aeterna-institute.org/library/latin/newton/optice/96","api":"https://interlinea.aeterna-institute.org/api/v1/library/latin/newton/optice/96","markdown":"https://interlinea.aeterna-institute.org/library/latin/newton/optice/96.md","author":{"name":"Newton","url":"https://interlinea.aeterna-institute.org/library/latin/newton"},"work":{"title":"Optice","url":"https://interlinea.aeterna-institute.org/library/latin/newton/optice","urn":null},"verse":false,"words":221,"text":"Amplior Solis Luminis Radius per fenestrae operculi foramen in Cubiculum tenebricosum transmissus refringatur majori Prismate AB C, cujus Angulus Refringens C sit amplius sexaginta graduum: Et simul ut primum iste radius e Prismate exierit, incidat deinceps super Chartam albam DE, a tergo inspissatam ad rigiditatem. His ita dispositis: Quum Charta Lumen illud excipiat ad perpendiculum objecta, quomodo ad DE depicta est; id super charta videbitur Album plane. Quum autem Charta ad Lumen valde sit inclinata, ita tamen ut Axi Prismatis semper parallela sit; utique ejus totius Luminis Albor, qui super charta visus fuerat, jam pro eo ac charta in hanc vel illam partem inclinata sit, immutabit se vel in Colorem flavum & rubeum, ut in positu e d; vel in caeruleum & violaceum, ut in positu 25. Quod si id Lumen, antequam in Chartam incidat, duobus Prismatibus inter se parallelis bis fuerit refractum ad easdem partes; jam Colores ante dicti, multo evidentiores clarioresque videbuntur. In hoc Experimento, mediae omnes partes latioris illius albi Luminis radii, qui in Chartam incidebat, utique sine ullo Umbrae confinio, qua modificari possent, factae sunt coloratae, idque ea ratione, ut unum eundemque colorem usquequaque induerint; quippe cum in medio Chartae idem semper, atque in extremis, color esset; isque color se pro varia chartae reflectentis obliquitate immutaret, sine ulla vel Refractionum vel Umbrae vel Luminis ipsius in Chartam incidentis mutatione.","prev":{"citation":"Optice 95","label":"LIBER PRIMUS","url":"https://interlinea.aeterna-institute.org/library/latin/newton/optice/95","api":"https://interlinea.aeterna-institute.org/api/v1/library/latin/newton/optice/95"},"next":{"citation":"Optice 97","label":"LIBER PRIMUS","url":"https://interlinea.aeterna-institute.org/library/latin/newton/optice/97","api":"https://interlinea.aeterna-institute.org/api/v1/library/latin/newton/optice/97"},"credit":{"text":"Newton (with Samuel Clarke), Optice. Text: NOSCEMUS Digital Sourcebook (Universität Innsbruck), CC BY 4.0. Changes: page furniture removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://zenodo.org/records/15040256","quality":"ocr"}}