{"kind":"section","lang":"la","language":"Latin","title":"Carmina 4","citation":"Saint Orientius, Carmina 4","ref":"4","level":null,"urn":null,"url":"https://interlinea.aeterna-institute.org/library/latin/orientius-saint/carmina/4","api":"https://interlinea.aeterna-institute.org/api/v1/library/latin/orientius-saint/carmina/4","markdown":"https://interlinea.aeterna-institute.org/library/latin/orientius-saint/carmina/4.md","author":{"name":"Saint Orientius","url":"https://interlinea.aeterna-institute.org/library/latin/orientius-saint"},"work":{"title":"Carmina","url":"https://interlinea.aeterna-institute.org/library/latin/orientius-saint/carmina","urn":"urn:cts:latinLit:stoa0215b.stoa002"},"verse":true,"words":331,"text":"Tibique, Domine, celsum Cherubim dicatum est,\nEt illa moles quadriformis machinae\nTe sempiterno confitentur carmine.\nEt nos imago consonantis cantici\nAmen sonamus, alleluia dicimus.\nTe septem primi deprecantur angeli,\nCeu ciuitatis septem principes uiri,\nSolio propinqui, ianitores proximi.\nEt nos imago consonantis cantici\nAmen sonamus, alleluia dicimus.\nTe solis astrum cum sorore menstrua,\nVergiliae Iugula Vesperugo Lucifer,\nOmnesque guttae praemicantes inuocant.\nEt nos imago consonantis cantici\nAmen sonamus, alleluia dicimus.\nAer aquosus siue sudus inuicem,\nSimulque uenti pluuiae grando flumina,\nRitu suomet conditorem concinunt.\nEt nos imago consonantis cantici\nAmen sonamus, alleluia dicimus.\nSolum statiuum cum fertura mobili\nQuae paret homini, quaeque + capta de una,\nTibi cantat uni, conticescit ceteris.\nEt nos imago consonantis cantici\nAmen sonamus, alleluia dicimus.\nOceane, cinctam qui coerces aream\nEt intestini fossa media gurgitis,\nDeum sonantes cum marinis beluis.\nEt nos imago consonantis cantici\nAmen sonamus, alleluia dicimus.\nInfernae sedis flamma, fulua tartara,\nTrucesque praesidentes pariter angeli,\nAmen minaci decantantes carmine.\nEt nos imago consonantis cantici\nAmen sonamus, alleluia dicimus.\nPostremo dico deprecandi canticum.\nId facio quantum per uiginti cantica.\nSed ne quis audax interpellet quippiam,\nAnguem magistrum falsitatis increpo,\nVt non adiciat neue demat litteram.\nQuod si quem laedit spiritalis lectio,\nEi licebit lectionem spernere,\nNon commutare lectionis normulam.\nAnguem magistrum falsitatis increpo,\nVt non adiciat neue demat litteram.\nSi scriptor errat in mutanda littera,\nIgnarus errat; uenia Christo, + si praesto est.\nNam non uoluntas, uerum dextra labitur.\nAnguem magistrum falsitatis increpo.\nVt non adiciat neue demat litteram.\nAd illos homines interdictum pertinet,\nQui uoce uera nominantur physici:\nSi non probatis, praeterire liberum est.\nVt non adiciat neue demat litteram.\nAnguem magistrum falsitatis increpo,\nEt nos a faece <hac> ethnicorum emersimus,\nEamque tandem rupimus caliginem,\nDum spiritales exaudimus angelos.\nAnguem ma<gistrum falsitatis increpo,\nut non adiciat neue demat litteram>.\n.. designo sextum praecauendam spiritu\n+ mortis Dei prophetas instrumenta daemonum\n+ numa et mortis semper in saeculum.\nDeus sancte, te rogamus Patrem Vnigeniti,\nChriste Deus, te precamur uiuum Dei Filium,\nSancte Christe, te obsecramus iudicem uerum Deum.","prev":{"citation":"Carmina 3.159-179","label":"Lines 3.159-3.179","url":"https://interlinea.aeterna-institute.org/library/latin/orientius-saint/carmina/3.159","api":"https://interlinea.aeterna-institute.org/api/v1/library/latin/orientius-saint/carmina/3.159"},"next":null,"credit":{"text":"Orientius, Saint, Carmina. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/ORIENT%7Ccami%7C001","quality":"proofread"}}