{"kind":"section","lang":"la","language":"Latin","title":"Commonitorium 1.189-230","citation":"Saint Orientius, Commonitorium 1.189-230","ref":"1.189","level":null,"urn":null,"url":"https://interlinea.aeterna-institute.org/library/latin/orientius-saint/commonitorium/1.189","api":"https://interlinea.aeterna-institute.org/api/v1/library/latin/orientius-saint/commonitorium/1.189","markdown":"https://interlinea.aeterna-institute.org/library/latin/orientius-saint/commonitorium/1.189.md","author":{"name":"Saint Orientius","url":"https://interlinea.aeterna-institute.org/library/latin/orientius-saint"},"work":{"title":"Commonitorium","url":"https://interlinea.aeterna-institute.org/library/latin/orientius-saint/commonitorium","urn":"urn:cts:latinLit:stoa0215b.stoa001"},"verse":true,"words":276,"text":"Cumque ita se solo naturae munere seruent,\nQuae nec consilio nec ratione uigent,\nQuid mirum domini si iussa uerenda secutum\nMutua constringet cura hominis hominem,\nAtque usu ingenio rebus ratione peritus\nVt sua quae tua sunt commoda frater agat?\nHinc uenit illa placens merito sententia, nectens\nHumanum parili condicione genus:\nNe facias aliis quidquid fieri tibi non uis,\nIdque aliis facias quod tibi uis fieri.\nQuod genus est hominum, qui ritus sexus et aetas,\nQuis neget hoc rectum, quis neget hoc facile?\nQuid non mandatum late complectitur artum?\nPlenius hac tradi quid breuitate potest?\nNamque ea quae mala sunt, fieri modo sic mihi nolim,\nVt rursum cupiam quae bona sunt fieri.\nIndice non opus est, doctor nec quaeritur ullus:\nDe nobis scimus quae bona, quae mala sunt.\nGaudebis certe, si quis te nocte uiantem\nBlandus uicinum ducat in hospitium:\nTu quoque sollicitus prouisis excipe tectis\nIllum, qui sera nocte uiator erit.\nVeste tegi nudus, sitiens ad pocla uocari,\nEsuriens optas ut satiere cibis:\nTe quoque permoueat proprii par cura laboris,\nDiuide cum miseris pallia, pocla, cibos.\nEcce manum poscis lapsus, solacia maestus,\nAuxilium trepidus, consilium dubius:\nId maestis dubiis trepidis labentibus offer:\nIn simili causa fac(==FA+C) ut ameris amans.\nCerte incusari te falso crimine non uis:\nCrimine falso alios insimulare time.\nOdisti furem: furtum fuge; perdere non uis\nPer uim quae tua sunt: nil uiolenter agas.\nPacta tibi dubio non uis nutare paratu:\nPromissam certo pectore redde fidem.\nQuae tibi detraxit uelles succidere linguam:\nCura sit ut nullum liuida uerba notent.\nMutua cum poscis, uis sumere protinus aera:\nMutua poscentem dextera prompta iuuet.\nElatos fastu damnas: depone tumorem;\nQuod fugis in celsis nesciat inferior.","prev":{"citation":"Commonitorium 1.143-188","label":"Book 1, lines 1.143-1.188","url":"https://interlinea.aeterna-institute.org/library/latin/orientius-saint/commonitorium/1.143","api":"https://interlinea.aeterna-institute.org/api/v1/library/latin/orientius-saint/commonitorium/1.143"},"next":{"citation":"Commonitorium 1.231-276","label":"Book 1, lines 1.231-1.276","url":"https://interlinea.aeterna-institute.org/library/latin/orientius-saint/commonitorium/1.231","api":"https://interlinea.aeterna-institute.org/api/v1/library/latin/orientius-saint/commonitorium/1.231"},"credit":{"text":"Orientius, Saint, Commonitorium. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/ORIENT%7Ccomm%7C001","quality":"proofread"}}