{"kind":"section","lang":"la","language":"Latin","title":"Commonitorium 1.325-372","citation":"Saint Orientius, Commonitorium 1.325-372","ref":"1.325","level":null,"urn":null,"url":"https://interlinea.aeterna-institute.org/library/latin/orientius-saint/commonitorium/1.325","api":"https://interlinea.aeterna-institute.org/api/v1/library/latin/orientius-saint/commonitorium/1.325","markdown":"https://interlinea.aeterna-institute.org/library/latin/orientius-saint/commonitorium/1.325.md","author":{"name":"Saint Orientius","url":"https://interlinea.aeterna-institute.org/library/latin/orientius-saint"},"work":{"title":"Commonitorium","url":"https://interlinea.aeterna-institute.org/library/latin/orientius-saint/commonitorium","urn":"urn:cts:latinLit:stoa0215b.stoa001"},"verse":true,"words":293,"text":"Nemo inter flores blandorum ambitus odorum\nNaribus assiduam non metet ungue rosam.\nNemo diu sitiens et multo sole perustus\nIncumbet gelidis nec potietur aquis.\nNemo uias pedibus brumali tempore carpens\nConspersus pluuia nec madefactus erit.\nNemo, licet mediis muris, sub tempore belli\nVel bene securus uel bene tutus agit.\nCongressus praestat uisum, mox lumina uisu\nConcipiunt flammas, parturiuntque nefas.\nDum ueluti iacto piscantis fraudibus hamo\nPrimo animus capitur, post etiam moritur.\nPrima mali labes heu femina! te dolus anguis,\nAtque hominem per te reppulit a domino.\nErepti tu causa boni, tu ianua mortis,\nTu decepta cito, tu cito decipiens.\nErgo age, qui nullo maculari pectora naeuo\nEt purus puro niteris esse animo,\nVt laqueos ignis gladios et acuta uenena\nCernere laudatam sic fugies faciem.\nNon ego nunc repetam per tot iam saecula quantos\nFeminei uultus perdiderint populos.\nPraetereo clades Spartanas, Troica bella,\nEt raptu excidium quam prope, Roma, tuum,\nCum gentes nulla domini sub lege nec ullis\nSanctorum ad uitam perdomitas monitis,\nQua furor impulerat, lasciuus duceret auctor,\nEsset et hoc licitum quod fuerat libitum.\nDe sacris, inquam, de sacris percipe libris,\nObprobrio quantis turpis amor fuerit.\nTe Dinae species nimio sub amore ruentem\nExstinxit, Sichem, cum patre, cum patria.\nNam male compressam fratrum pia cura sororem\nPromittit thalamo, uindicat in gladio.\nHunc quoque laudatum psalmorum carmine Dauid\nForma placens celso deposuit solio,\nCum male lasciuum comperto crimine corpus\nSacco contegeret, contereret cinere.\nThamar forma duos sub eodem tempore fratres\nIncesti et ferri perpulit in facinus.\nVnus corrumpit, corruptam ulciscitur alter:\nVltio quae iusta est, desinit esse pia.\nIpse etiam Salomon, cuius sapientia prisco\nTempore et <in> toto nobilis orbe fuit,\nDucitur in facinus uetito laqueatus amore,\nFemineo subdens turpia colla iugo,\nEt domini immemorem merito praeconia laudum,\nQuae iuuenem ornarant, destituere senem.","prev":{"citation":"Commonitorium 1.277-324","label":"Book 1, lines 1.277-1.324","url":"https://interlinea.aeterna-institute.org/library/latin/orientius-saint/commonitorium/1.277","api":"https://interlinea.aeterna-institute.org/api/v1/library/latin/orientius-saint/commonitorium/1.277"},"next":{"citation":"Commonitorium 1.373-420","label":"Book 1, lines 1.373-1.420","url":"https://interlinea.aeterna-institute.org/library/latin/orientius-saint/commonitorium/1.373","api":"https://interlinea.aeterna-institute.org/api/v1/library/latin/orientius-saint/commonitorium/1.373"},"credit":{"text":"Orientius, Saint, Commonitorium. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/ORIENT%7Ccomm%7C001","quality":"proofread"}}