{"kind":"section","lang":"la","language":"Latin","title":"Commonitorium 1.373-420","citation":"Saint Orientius, Commonitorium 1.373-420","ref":"1.373","level":null,"urn":null,"url":"https://interlinea.aeterna-institute.org/library/latin/orientius-saint/commonitorium/1.373","api":"https://interlinea.aeterna-institute.org/api/v1/library/latin/orientius-saint/commonitorium/1.373","markdown":"https://interlinea.aeterna-institute.org/library/latin/orientius-saint/commonitorium/1.373.md","author":{"name":"Saint Orientius","url":"https://interlinea.aeterna-institute.org/library/latin/orientius-saint"},"work":{"title":"Commonitorium","url":"https://interlinea.aeterna-institute.org/library/latin/orientius-saint/commonitorium","urn":"urn:cts:latinLit:stoa0215b.stoa001"},"verse":true,"words":295,"text":"Forma placens regi leto te tradidit, Aman:\nForma tuum rapuit, dux Oloferne, caput.\nIllum mirifico famosum robore Samson\nForma decens saeuis tradidit allophylis.\nSanctus <is> et uictor per tot modo proelia miles,\nHeu male femineis subditur arte choris,\nVt iam pollutus, pariunt quia crimina poenam,\nOscula uirginibus, terga daret gladiis.\nTu quoque Leuitis tantum dilecta nec uxor,\nInsano iuuenum subdita nocte toro,\nVindictae studio totas in bella dedisti\nPerdere contentas siue perire tribus,\nVt membris lacero dispersis funere Gabaat(==GABA.AT)\nEfficeret diris ignibus usta rogum.\nNon, mihi si linguae centum sint oraque centum,\nExpediam quantum forma placens noceat.\nLasciuo clamat benedictus apostolus orbi,\nDans etiam licitis iura seuera toris;\nConiuge possessus, contempta coniuge liber\nNon similem causam relligionis habent.\nConiugis implicitum detentat cura maritum:\nSolum uult caelebs emeruisse deum.\nSed quia nonnumquam succumbunt lumina et omne\nAncipiti rectum labitur in biuio,\nSi purum maculare animum parat impius hostis,\nSemper ouans castam sollicitare fidem,\nAccipe tela, quibus cordis pia moenia serues:\nCrux tibi sit clipeus, crux tibi sit gladius.\nSupplicibus lacrimis gemitu prece pectore tunso,\nQuaere salutiferum nocte dieque deum.\nAc ne paulatim facilem spes palpet amorem,\nLapsum a praecipiti perge referre pedem.\nNon ignarus enim miseris succurrere tempto,\nOmnia perpessus, quae fugienda loquor.\nRespicis ad formam? sed saeuas respice poenas,\nRespice quid laudes, respice quid timeas,\nInternisque oculis et uero lumine cerne\nDe terra ad caelum deque homine ad dominum.\nHic breuis est fine exiguo claudenda uoluptas:\nIllic perpetuo sulphure flamma uorax.\nAudi clamantem celsa cum uoce propheten,\nSeu mandata legas pristina, siue noua:\n\"Quae laus in uultu est? faenum omnem credite carnem,\nQuippe ut flos faeni gloria carnis erit.\"\nNam ueluti flores ictus metit, atterit aestus,\nConfundunt imbres, fortior aura rapit,\nSic uultum quicumque placet, consumere tempus\nEt tumor et liuor despoliare potest.","prev":{"citation":"Commonitorium 1.325-372","label":"Book 1, lines 1.325-1.372","url":"https://interlinea.aeterna-institute.org/library/latin/orientius-saint/commonitorium/1.325","api":"https://interlinea.aeterna-institute.org/api/v1/library/latin/orientius-saint/commonitorium/1.325"},"next":{"citation":"Commonitorium 1.421-466","label":"Book 1, lines 1.421-1.466","url":"https://interlinea.aeterna-institute.org/library/latin/orientius-saint/commonitorium/1.421","api":"https://interlinea.aeterna-institute.org/api/v1/library/latin/orientius-saint/commonitorium/1.421"},"credit":{"text":"Orientius, Saint, Commonitorium. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/ORIENT%7Ccomm%7C001","quality":"proofread"}}