{"kind":"section","lang":"la","language":"Latin","title":"Commonitorium 1.467-514","citation":"Saint Orientius, Commonitorium 1.467-514","ref":"1.467","level":null,"urn":null,"url":"https://interlinea.aeterna-institute.org/library/latin/orientius-saint/commonitorium/1.467","api":"https://interlinea.aeterna-institute.org/api/v1/library/latin/orientius-saint/commonitorium/1.467","markdown":"https://interlinea.aeterna-institute.org/library/latin/orientius-saint/commonitorium/1.467.md","author":{"name":"Saint Orientius","url":"https://interlinea.aeterna-institute.org/library/latin/orientius-saint"},"work":{"title":"Commonitorium","url":"https://interlinea.aeterna-institute.org/library/latin/orientius-saint/commonitorium","urn":"urn:cts:latinLit:stoa0215b.stoa001"},"verse":true,"words":281,"text":"Haec Ioseph nimio fratrum sub crimine causa\nPrimum seruitii, mox fuit imperii.\nHaec iusti fratris maculauit sanguine Cain,\nHaec Dauid mortis quam prope causa fuit,\nCum, iam confecto solius robore bello,\nExtolli nollet laude socer generum.\nHac primae cogente gemens operarius horae\nVincere fossorem nititur undecimae.\nHaec postrema dedit crucis in ludibria Christum,\nDum peragit liuor credulitatis opus,\nEt praeceps populus signa ac miracula rerum\nObtutu cernit, pectore non recipit.\nIn tantum studiis furialibus improba cunctos\nA uero in facinus uerterat inuidia,\nVt non nescirent, sed nollent credere, quod tunc\nEsset per dominum glorificandus homo.\nNec cura leuiore dehinc uitale memento\nVnius innumerum crimen auaritiae.\nOmnibus in terris, quas sol uidet, aequora claudunt,\nQuasque dies adeunt, quasque tegunt tenebrae,\nIgnoto nobis quidquid diffunditur orbe,\nOmnibus in regnis, omnibus in populis,\nInfectis morbo multorum mentibus haec est\nRadix causa caput fons et origo mali.\nInnocuos quidquid dominus formarat in usus,\nHaec male mutatis perdidit officiis.\nQuid quereris diros portus uentosque furentes,\nTristia famosis aequora naufragiis?\nTu caesam siluis annoso robore quercum,\nSi tignis non est utilis, adde focis.\nContentusque tuo, submotum si qua per orbem\nNascuntur, patiens crede negata tibi.\nEt pelagi motus et saeuas flare procellas\nSecurus tuto litore prospicies.\nVsum naturae uitium fecistis, auari,\nNata bona prauis usibus esse mala.\nE terra genitum terrena in munera ferrum\nFalcibus incuruum, uomeribus rigidum,\nIn caedem et diras, bellorum crimina, mortes\nArmamus contis missilibus gladiis.\nPelleret ut frigus uiolentum accepimus ignem,\nPelleret ut tenebras discoqueretque dapes:\nCoepimus insani flammas immittere tectis\nAtque exurendis subdere corporibus,\nTamquam esset paruum praedandi in crimine crimen,\nNi ferret sparsas sanguine raptor opes,\nEt miseros poenis uariis uis ultima cogat,\nCum quod habent perdant, dicere si qua latent.","prev":{"citation":"Commonitorium 1.421-466","label":"Book 1, lines 1.421-1.466","url":"https://interlinea.aeterna-institute.org/library/latin/orientius-saint/commonitorium/1.421","api":"https://interlinea.aeterna-institute.org/api/v1/library/latin/orientius-saint/commonitorium/1.421"},"next":{"citation":"Commonitorium 1.515-560","label":"Book 1, lines 1.515-1.560","url":"https://interlinea.aeterna-institute.org/library/latin/orientius-saint/commonitorium/1.515","api":"https://interlinea.aeterna-institute.org/api/v1/library/latin/orientius-saint/commonitorium/1.515"},"credit":{"text":"Orientius, Saint, Commonitorium. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/ORIENT%7Ccomm%7C001","quality":"proofread"}}