{"kind":"section","lang":"la","language":"Latin","title":"Commonitorium 1.49-96","citation":"Saint Orientius, Commonitorium 1.49-96","ref":"1.49","level":null,"urn":null,"url":"https://interlinea.aeterna-institute.org/library/latin/orientius-saint/commonitorium/1.49","api":"https://interlinea.aeterna-institute.org/api/v1/library/latin/orientius-saint/commonitorium/1.49","markdown":"https://interlinea.aeterna-institute.org/library/latin/orientius-saint/commonitorium/1.49.md","author":{"name":"Saint Orientius","url":"https://interlinea.aeterna-institute.org/library/latin/orientius-saint"},"work":{"title":"Commonitorium","url":"https://interlinea.aeterna-institute.org/library/latin/orientius-saint/commonitorium","urn":"urn:cts:latinLit:stoa0215b.stoa001"},"verse":true,"words":315,"text":"Vnam nascendi ratio prius omnibus affert,\nHanc cura et propriis consequitor meritis.\nNasci non nostrum, nec longum uiuere nostrum:\nVitam quae sequitur uita parare potest.\nEt licet arbitrio domini sumamus utramque,\nAc neutra obueniat, ni deus hoc iubeat,\nPrima tamen celeri fertur per prona rotatu,\nQuae sequitur totis est data temporibus.\nIn primam ignari nulla mercede uenimus,\nAltera de summo parta labore uenit.\nNascimur ut dominum caeli terraeque marisque\nQuaeramus toto peruigiles studio.\nQuaerimus, ut qui sit, quantus uel qualis, agat quid,\nVero possimus noscere iudicio.\nNoscimus, ut digna compertum laude colamus:\nVt uitam tribuat perpetuam, colimus.\nEt colimus non ture dato, non sanguine fuso,\nNon uino madidi, non epulis grauidi.\nAurum uestis odor pecudes libamina gemmae,\nEt quae rara homines uel pretiosa putant,\nAnte deum, ut uiles terreno e pondere moles,\nVt caenum, ut sordes, sic inhonora iacent.\nOmnia sunt eius, cuius nos esse fatemur.\nNil proprium est nobis: ipse habet, ipse dedit.\nEcce etenim sancto proclamat in ore prophetae:\nNolo tuos hircos, nolo tuos uitulos.\nEt species agri mecum est et gloria caeli:\nOrbis enim meus est, et quod in orbe meum.\nDebita soluantur sancto mihi pectore uota:\nHostia me laudis puraque uox celebret.\nErgo nihil noster poteris praetendere lector,\nIstis quod tibi sit difficile in monitis.\nNon longe positum, non est aliunde petendum,\nNon re, non sumptu, non opus est pretio.\nSufficit ut dominum mundi rerumque parentem,\nCuius in arbitrio uel bona uel mala sunt,\nSensu maiori uincentem uerba loquentis,\nVnum, incorporeum, perpetuoque sacrum,\nOmnia complexum uel semper in omnibus unum,\nCorde pius credas, credulus ore roges.\nSed quid sic nudis tantum sermonibus utor,\nTamquam nulla dei sint super hoc monita?\nNam primum ueteri cautum sub lege memento,\nQuae dudum in solidis scripta fuit tabulis,\nQuod nunc per dominum renouat data gratia Christum,\nAtque euangelii uox ueneranda sonat,\nVt, quod saxa prius, modo pectora nostra tenerent,\nEsset et uberior bis repetita fides.","prev":{"citation":"Commonitorium 1.1-48","label":"Book 1, lines 1.1-1.48","url":"https://interlinea.aeterna-institute.org/library/latin/orientius-saint/commonitorium/1.1","api":"https://interlinea.aeterna-institute.org/api/v1/library/latin/orientius-saint/commonitorium/1.1"},"next":{"citation":"Commonitorium 1.97-142","label":"Book 1, lines 1.97-1.142","url":"https://interlinea.aeterna-institute.org/library/latin/orientius-saint/commonitorium/1.97","api":"https://interlinea.aeterna-institute.org/api/v1/library/latin/orientius-saint/commonitorium/1.97"},"credit":{"text":"Orientius, Saint, Commonitorium. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/ORIENT%7Ccomm%7C001","quality":"proofread"}}