{"kind":"section","lang":"la","language":"Latin","title":"Commonitorium 2.1-46","citation":"Saint Orientius, Commonitorium 2.1-46","ref":"2.1","level":null,"urn":null,"url":"https://interlinea.aeterna-institute.org/library/latin/orientius-saint/commonitorium/2.1","api":"https://interlinea.aeterna-institute.org/api/v1/library/latin/orientius-saint/commonitorium/2.1","markdown":"https://interlinea.aeterna-institute.org/library/latin/orientius-saint/commonitorium/2.1.md","author":{"name":"Saint Orientius","url":"https://interlinea.aeterna-institute.org/library/latin/orientius-saint"},"work":{"title":"Commonitorium","url":"https://interlinea.aeterna-institute.org/library/latin/orientius-saint/commonitorium","urn":"urn:cts:latinLit:stoa0215b.stoa001"},"verse":true,"words":275,"text":"Si monitis gradiare meis, fidissime lector,\nCaerula securus colla premis colubri.\nCumque aderit Christus iudex, mox obuius ibis\nPer tenerum blandis aera uecte notis.\nTantum ut mandatis quouis sub tempore in istis\nPraetereat curam portio nulla tuam.\nAn si uentosae moueat te gloria linguae,\nQuam suadet uano Tullius eloquio\n(Sin fugienda, iocus conuiuia sermo uoluptas,\nSic etiam aequaeuis dissociande tuis),\nQuo studio nostri seruabis uerba libelli,\nVt uitae meritis consociande deo?\nPraecipuus labor est blandam contemnere laudem,\nQuae trahit in praeceps ambitiose homines,\nEt semper tacito festinat ad intima motu\nVisceribusque ipsis pestis acerba sedet.\nOmnia dum uolumus, facimus quaecumque, probari,\nVtque suis nullus non faueat uitiis,\nLenito titulo parcum se dicit auarus,\nAcris uelatur nomine saeuitia,\nAc studiis totis et tota nitimur arte,\nVt quidquid loquimur uel facimus placeat.\nAt tu si Christo soli uis esse probatus,\nGloria quaeratur nulla tibi ex homine.\nNam cum deiectus, mos exaltabere, erisque\nPro domino paruus, magnus apud dominum.\nContentum uexet quaecumque iniuria, nulli,\nSi male pertuleris, par quoque redde malum.\nEcce patrem Christus pro se lacerantibus orat,\nSupplicat et Stephanus, supplicat et Iacob(==IACOB),\nDum miti magnoque animo licet ultima passi\nPoenarum nulli causa uolunt fieri.\nNullum saeua reum faciat sententia, nullum\nAustero properes plectere iudicio.\nFestucam tenuem fraterno in lumine cernis,\nLuminibusque tuis nescis inesse trabem.\nIniuste alterius cupiet describere uitam,\nAssertor uitae qui nequit esse suae.\nSed nos damnati uitiis insistimus et quae\nIpsi persequimur mos etiam facimus.\nFallere crede nefas! durat sententia dicens:\nOs, quod mentitur, morte animum perimit.\nEt quod erit ueras semper dixisse memento,\nEt non quod non est sermo tuus resonet.\nDulci praeterea frenos impone palato,\nNe sapor antiquum saeuiat illecebris.","prev":{"citation":"Commonitorium 1.603-618","label":"Book 1, lines 1.603-1.618","url":"https://interlinea.aeterna-institute.org/library/latin/orientius-saint/commonitorium/1.603","api":"https://interlinea.aeterna-institute.org/api/v1/library/latin/orientius-saint/commonitorium/1.603"},"next":{"citation":"Commonitorium 2.47-90","label":"Book 2, lines 2.47-2.90","url":"https://interlinea.aeterna-institute.org/library/latin/orientius-saint/commonitorium/2.47","api":"https://interlinea.aeterna-institute.org/api/v1/library/latin/orientius-saint/commonitorium/2.47"},"credit":{"text":"Orientius, Saint, Commonitorium. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/ORIENT%7Ccomm%7C001","quality":"proofread"}}