{"kind":"section","lang":"la","language":"Latin","title":"Commonitorium 2.135-180","citation":"Saint Orientius, Commonitorium 2.135-180","ref":"2.135","level":null,"urn":null,"url":"https://interlinea.aeterna-institute.org/library/latin/orientius-saint/commonitorium/2.135","api":"https://interlinea.aeterna-institute.org/api/v1/library/latin/orientius-saint/commonitorium/2.135","markdown":"https://interlinea.aeterna-institute.org/library/latin/orientius-saint/commonitorium/2.135.md","author":{"name":"Saint Orientius","url":"https://interlinea.aeterna-institute.org/library/latin/orientius-saint"},"work":{"title":"Commonitorium","url":"https://interlinea.aeterna-institute.org/library/latin/orientius-saint/commonitorium","urn":"urn:cts:latinLit:stoa0215b.stoa001"},"verse":true,"words":280,"text":"Deuotum uincet quae tandem iniuria pectus?\nEcquid erit celsum? quid tibi difficile est?\nNamque nihil durum est, cum spes succedit, et omnis\nPeruenit ad fructum uictus honore labor,\nEt fructum, toto qui duret tempore, quem non\nAuferat ambitor prodigus impatiens.\nAudis spondentem dominum noua praemia iustis,\nPromissis semper qui meliora dabit,\nNon conspecta oculis, non auribus insinuata,\nIpso non sensu praemeditata prius.\nNunc tibi distillant pretioso cortice myrrhae,\nTuris odorato caespite terra tumet.\nAdde thymum uiolas casias melilota crocumque,\nCandida puniceis lilia iunge rosis.\nCum tot in his terris peccator munera sumas,\nIn caelis sanctus quae bona percipies?\nFinge age quod clarum, quod pulchrum, quod pretiosum,\nEt toto magnum quidquid in orbe putas,\nHoc meritis dandum felicibus, aurea tecta,\nGemmatos postes purpureumque solum,\nRuraque uernanti semper redolentia flore,\nLacte et melle simul flumina plena trahi.\nHaec quia conscendunt animos, et mente uidentur,\nInferiora illis crede futura bonis.\nNec uereare tamen, longo ne tempore uictus\nImpar mandatis reperiare dei.\nNil habet haec longum, longo licet acta rotatu,\nQuo nunc perfruimur tempore, uita breuis.\nLassa senescentem respectant omnia finem\nEt iam postremo uoluitur hora die.\nRespice quam raptim totum mors presserit orbem,\nQuantos uis belli perculerit populos.\nNon densi nemoris, celsi non aspera montis,\nFlumina non rapidis fortia gurgitibus,\nNon castella locis, non tutae moenibus urbes,\nInuia non pelago, tristia non heremo,\nNon caua, non etiam tetricis sub rupibus antra,\nLudere barbaricas praeualuere manus.\nMultis ficta fides, multis periuria, multis\nCausa fuit mortis ciuica proditio.\nInsidiae multum, multum uis publica fecit.\nRobore quae non sunt, sunt superata fame.\nConcidit infelix cum prole et coniuge mater,\nCum seruis dominus seruitium subiit.\nHi canibus iacuere cibus, flagrantia multis,\nQuae rapuere animam, tecta dedere rogum.","prev":{"citation":"Commonitorium 2.91-134","label":"Book 2, lines 2.91-2.134","url":"https://interlinea.aeterna-institute.org/library/latin/orientius-saint/commonitorium/2.91","api":"https://interlinea.aeterna-institute.org/api/v1/library/latin/orientius-saint/commonitorium/2.91"},"next":{"citation":"Commonitorium 2.181-223","label":"Book 2, lines 2.181-2.223","url":"https://interlinea.aeterna-institute.org/library/latin/orientius-saint/commonitorium/2.181","api":"https://interlinea.aeterna-institute.org/api/v1/library/latin/orientius-saint/commonitorium/2.181"},"credit":{"text":"Orientius, Saint, Commonitorium. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/ORIENT%7Ccomm%7C001","quality":"proofread"}}