{"kind":"section","lang":"la","language":"Latin","title":"Commonitorium 2.181-223","citation":"Saint Orientius, Commonitorium 2.181-223","ref":"2.181","level":null,"urn":null,"url":"https://interlinea.aeterna-institute.org/library/latin/orientius-saint/commonitorium/2.181","api":"https://interlinea.aeterna-institute.org/api/v1/library/latin/orientius-saint/commonitorium/2.181","markdown":"https://interlinea.aeterna-institute.org/library/latin/orientius-saint/commonitorium/2.181.md","author":{"name":"Saint Orientius","url":"https://interlinea.aeterna-institute.org/library/latin/orientius-saint"},"work":{"title":"Commonitorium","url":"https://interlinea.aeterna-institute.org/library/latin/orientius-saint/commonitorium","urn":"urn:cts:latinLit:stoa0215b.stoa001"},"verse":true,"words":280,"text":"Per uicos uillas, per rura et compita et omnes\nPer pagos, totis inde uel inde uiis,\nMors dolor excidium <clades> incendia luctus.\nVno fumauit Gallia tota rogo.\nCur tamen enumerem labentis funera mundi,\nQuae per consuetum semper aguntur iter?\nCur repetam quanti toto moriantur in orbe,\nIpse tuam uideas cum properare diem?\nPraetereo gladiis quantum, quantumque ruinis\nIgni grandinibus fluminibus liceat;\nQuantos bella fames perimant morbique furentes\nEt quae per uarias mors ruit una uias.\nQuantos et mediae pacis sub tempore, ut esse\nPax possit, + cruciat debita poena reos.\nOmnis paulatim leto nos applicat hora:\nHoc quoque quo loquimur tempore, praemorimur.\nEt per fallentes tacito molimine cursus\nVrget supremos ultima uita dies.\nDum cibus et somnus, dum uerba et pocula mulcent,\nSiue domo sedeas, seu peregrina petas,\nDumque geris quodcumque geris uel non geris, ultro\nMors mouet alternum nil remorata pedem.\nCereus ut caecae positus sub tempore noctis\nCompensare diem luminis officio,\nDum non sentimus, lento consumitur igni,\nSemper et ad finem flamma uorax properat:\nSic hominum res est: pereunt quaecumque geruntur,\nProficit et moritur quod sibi uita trahit.\nSed fac uiuacis spatia haec tam longa senectae,\nOrbis ut immunis funera respicias,\nSero licet ueniat, ueniat tamen ille necesse est\nQui non in totum finis abesse potest.\nNam quae nascuntur, crescunt post atque senescunt,\nEt senio fessis nil nisi mors superest.\n+ intereunt decies qui ternos uixerit annos\nAtque illum uixit qui modo + millesimus,\nPostquam postremus finis retinebit utrumque,\nCerte supremo tempore mortis idem est.\nQuid uitam traxisse iuuat, si uiuere cessas?\nQuaeue bonis merces, si teneare malis,\n+ cum, nisi dum frueris, fructu tangere fruendi,\nEt uita haec uitae uiuat in officio?\nNam quod iam fuerat nihil est, si desinit esse;","prev":{"citation":"Commonitorium 2.135-180","label":"Book 2, lines 2.135-2.180","url":"https://interlinea.aeterna-institute.org/library/latin/orientius-saint/commonitorium/2.135","api":"https://interlinea.aeterna-institute.org/api/v1/library/latin/orientius-saint/commonitorium/2.135"},"next":{"citation":"Commonitorium 2.224-274","label":"Book 2, lines 2.224-2.274","url":"https://interlinea.aeterna-institute.org/library/latin/orientius-saint/commonitorium/2.224","api":"https://interlinea.aeterna-institute.org/api/v1/library/latin/orientius-saint/commonitorium/2.224"},"credit":{"text":"Orientius, Saint, Commonitorium. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/ORIENT%7Ccomm%7C001","quality":"proofread"}}