{"kind":"section","lang":"la","language":"Latin","title":"Commonitorium 2.275-324","citation":"Saint Orientius, Commonitorium 2.275-324","ref":"2.275","level":null,"urn":null,"url":"https://interlinea.aeterna-institute.org/library/latin/orientius-saint/commonitorium/2.275","api":"https://interlinea.aeterna-institute.org/api/v1/library/latin/orientius-saint/commonitorium/2.275","markdown":"https://interlinea.aeterna-institute.org/library/latin/orientius-saint/commonitorium/2.275.md","author":{"name":"Saint Orientius","url":"https://interlinea.aeterna-institute.org/library/latin/orientius-saint"},"work":{"title":"Commonitorium","url":"https://interlinea.aeterna-institute.org/library/latin/orientius-saint/commonitorium","urn":"urn:cts:latinLit:stoa0215b.stoa001"},"verse":true,"words":296,"text":"Hos tenebrae iuges caeca sub nocte manebunt:\nHis lumen + tunc flamma seuera dabit.\nIsti sulphureo flagrantes igne caminos\nCogentur laceris scandere corporibus.\nIllos constringet uiolento infusa rigore\nFlatibus hibernis dura gelu glacies.\nEt cum tam discors pugnet natura gehennae,\nNominis unius uis tamen est uaria.\nNec tam diuersa possis dinoscere poena,\nIgne sit an grauius frigore supplicium.\nNon quod nos, istic, terrena morte peremptis,\nExcipient unam crimina multa necem,\nCum quamuis saeuus pro rerum pondere iudex\nNon aliud possit quam rapuisse animam,\nEt quodam scelerum lucro, si plurima restent,\nVindictam reliquis ultio prima neget.\nAst illic omnes persoluet in ordine noxas\nSuccedens factis congrua poena suis.\nAtque unum corpus per singula membra patebit,\nQuot potuit uitiis, tot quoque suppliciis.\nAltera crudeles, lex altera plectet auaros:\nFacta aliter soluent et meditata aliter.\nEst sua periuris, est <et> sua poena superbis,\nAtque alia effusi causa cruoris erit.\nInuidus impatiens mollis falsator adulter,\nEt uini totus, totus et illecebrae,\nDextram caede nocens, linguam in conuicia promptans,\nPeruasor iactans impius indocilis\nIudicii ante diem poenas dabit, ut neque paruum\nSupplicii spatium det mora iudicii.\nAmbibunt alios sinuosis flexibus angues,\nAst alios candens igne catena teret.\nOmnia plena illic lacrimis terrore dolore,\nEt uox nulla, nisi(==NI-SI+) quam dederit gemitus.\nEcquidnam ulterius per singula crimina curram\nVexabunt diris quae miseros crucibus?\nQuando etiam incauto si quid nunc ore loqueris,\nSermonis ratio est discutienda tibi.\nHos inter, rerum dominum quicumque negarit,\nSummittens saxis stipitibusque caput,\nIlle miser uere, nec erit miserabilis ulli.\nExcipiet solus quidquid ubique nocet.\nInnumeri uermes morituro in corpore uiuent,\nNec finis fumo quem dabit ignis, erit.\nAt parte ex alia blandorum + uerba piorum,\nSi nec uexati restituere malum,\nAuxilium miseris, uictum tribuere petenti,\nAffectum notis, seruitium patribus,\nInstar flammantis fulgebunt lumina solis,\nVelati niueis splendida membra togis.","prev":{"citation":"Commonitorium 2.224-274","label":"Book 2, lines 2.224-2.274","url":"https://interlinea.aeterna-institute.org/library/latin/orientius-saint/commonitorium/2.224","api":"https://interlinea.aeterna-institute.org/api/v1/library/latin/orientius-saint/commonitorium/2.224"},"next":{"citation":"Commonitorium 2.325-374","label":"Book 2, lines 2.325-2.374","url":"https://interlinea.aeterna-institute.org/library/latin/orientius-saint/commonitorium/2.325","api":"https://interlinea.aeterna-institute.org/api/v1/library/latin/orientius-saint/commonitorium/2.325"},"credit":{"text":"Orientius, Saint, Commonitorium. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/ORIENT%7Ccomm%7C001","quality":"proofread"}}