{"kind":"section","lang":"la","language":"Latin","title":"Commonitorium 2.375-418","citation":"Saint Orientius, Commonitorium 2.375-418","ref":"2.375","level":null,"urn":null,"url":"https://interlinea.aeterna-institute.org/library/latin/orientius-saint/commonitorium/2.375","api":"https://interlinea.aeterna-institute.org/api/v1/library/latin/orientius-saint/commonitorium/2.375","markdown":"https://interlinea.aeterna-institute.org/library/latin/orientius-saint/commonitorium/2.375.md","author":{"name":"Saint Orientius","url":"https://interlinea.aeterna-institute.org/library/latin/orientius-saint"},"work":{"title":"Commonitorium","url":"https://interlinea.aeterna-institute.org/library/latin/orientius-saint/commonitorium","urn":"urn:cts:latinLit:stoa0215b.stoa001"},"verse":true,"words":261,"text":"Atque inter flammae tractus sonitusque tubarum\nAngelicosque choros militiamque sacram,\nInter et infantum matrum iuuenumque senumque\nPallores fletus gaudia uota metus,\nVltima suspensae dabitur sententia turbae,\nQuae sacrosancti iudicis ore sonet:\nIn requiem et laudem iustorum perge caterua,\nA regno numquam dissocianda meo,\nQuae uobis gnarus meriti uitaeque futurae\nDat modo, sed dudum dona parata pater\nAt tu mandatis semper contraria nostris,\nImpia tartareis claudere turba locis.\nIllic stridorem dentes et lumina fletum,\nIgnibus immodicis discruciauda, dabunt.\nEt tamen, ut uere maneant quaecumque iubentur,\nHaec erit aeterni formula iudicii:\nGloria quae iustum, summota morte tenebit\nAtque reus poenae non moriturus erit.\nHaec ego debueram factis tibi tradere, lector,\nVt pondus uerbis uita probata daret.\nSed quia neglegimus miseri quaecumque monemur\nEt satis est leuius discere quam facere,\nTu si commendes animo demissa per aurem\nOmnia, quae scriptis sunt numerata meis,\nConstanter dicam, caeli statione receptus\nDiscuties saeuae uincula dura necis\nAtque etiam fueras qui filius ante gehennae,\nIncipies summi filius esse dei.\nHis illud superest, sine quo nihil omnia prosunt,\nVt Christum credas de patre cumque patre;\nSpiritus et sanctus nullo discrimine iunctus\nVnum consumment nomina trina deum.\nAt tu + cum legis nostrum quicumque libellum,\nNostri, seu malus est seu bonus, esto memor.\nEt quotiens dominum perlecto carmine Christum\nOrabis, simus semper in ore tuo.\nQuod ne me primis credas iniungere labris\nNeue istud tuto dissimulare putes,\nSic te nulla dies curis compungat amaris,\nSic Christo totum quidquid agis placeat,\nSic sumas sanctam domino tradente coronam,\nNominis abscedat ne tibi cura mei,\nVt peccatores uincens Orientius omnes\nSanctorum ueniam promerear precibus.","prev":{"citation":"Commonitorium 2.325-374","label":"Book 2, lines 2.325-2.374","url":"https://interlinea.aeterna-institute.org/library/latin/orientius-saint/commonitorium/2.325","api":"https://interlinea.aeterna-institute.org/api/v1/library/latin/orientius-saint/commonitorium/2.325"},"next":null,"credit":{"text":"Orientius, Saint, Commonitorium. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/ORIENT%7Ccomm%7C001","quality":"proofread"}}