{"kind":"section","lang":"la","language":"Latin","title":"Commonitorium 2.47-90","citation":"Saint Orientius, Commonitorium 2.47-90","ref":"2.47","level":null,"urn":null,"url":"https://interlinea.aeterna-institute.org/library/latin/orientius-saint/commonitorium/2.47","api":"https://interlinea.aeterna-institute.org/api/v1/library/latin/orientius-saint/commonitorium/2.47","markdown":"https://interlinea.aeterna-institute.org/library/latin/orientius-saint/commonitorium/2.47.md","author":{"name":"Saint Orientius","url":"https://interlinea.aeterna-institute.org/library/latin/orientius-saint"},"work":{"title":"Commonitorium","url":"https://interlinea.aeterna-institute.org/library/latin/orientius-saint/commonitorium","urn":"urn:cts:latinLit:stoa0215b.stoa001"},"verse":true,"words":278,"text":"Illos caelorum donis regnisque potitos\nFecit mortales ambitiosa gula.\nDum magis in uetitum ruimus cupimusque negata\nEt, quod difficile est, hoc potius uolumus.\nPraecipue largo uenas perfundere uino\nRespue, ne raptim uina uenena fiant.\nVt nimiis quotiens sitit aestibus arida tellus,\nSolers in fructus quam parat agricola,\nSi prius euulsas quam sol internecet herbas,\nIrrorent madidos nubila densa dies,\nProtinus et sentes et gramina noxia messi\nSeminibus uictis heu male laeta feret:\nCorpora sic multo fuerint quae dedita uino,\nConsiliis pereunt, luxuriant uitiis.\nEt quid sordidius, quid erit deformius umquam,\nQuam si te tibimet subtrahat ebrietas?\nCum caput huc illuc uergat, gressusque uacillet,\nMensque neget sensum, lingua tenere sonum,\nClaudantur grauido uergentia lumina somno,\nQuid facis ignores, tu quoque cum facias.\nQuid loquar allatum uultu fumante calorem,\nEt male compositis uerba soluta modis,\nLabentes manibus calices, mensasque per ipsas\nImmixtos uino saepe redire cibos,\nTeque per innumeros, cum uult mens saucia motus\nVel gaudere nimis uel modo flere nimis,\nEt nunc saltatu uergentia membra rotare,\nNunc dare lasciuis brachia mota choris?\nExclamare libet, uino dapibusque sepultum,\nForte etiam proprii nominis immemorem,\nEius, qui donet largus tibi talia, quando\nOrandi subeat tunc pia cura dei?\nPascere tam magno sumptu quot posset egenos,\nQuotque dies laetos haec daret una dies?\nAt te nunc saturo pauper ieiunus oberrat:\nTu uinum reuomis, uix habet alter aquam.\nEt si forte cibum uox poscit egena, negabis\nOllis, quis nihil est, hoc, tibi quod superest.\nSentio iam dudum tacitum te dicere, lector:\nVera quidem, sed sunt ardua quae statuis.\nArdua praecipimur; de terra scandere caelum,\nNon est quod paruo stare labore putes.\nMagnus enim labor est; sed merces magna labori.\nPraemia qui sperat, desidiam fugiat.","prev":{"citation":"Commonitorium 2.1-46","label":"Book 2, lines 2.1-2.46","url":"https://interlinea.aeterna-institute.org/library/latin/orientius-saint/commonitorium/2.1","api":"https://interlinea.aeterna-institute.org/api/v1/library/latin/orientius-saint/commonitorium/2.1"},"next":{"citation":"Commonitorium 2.91-134","label":"Book 2, lines 2.91-2.134","url":"https://interlinea.aeterna-institute.org/library/latin/orientius-saint/commonitorium/2.91","api":"https://interlinea.aeterna-institute.org/api/v1/library/latin/orientius-saint/commonitorium/2.91"},"credit":{"text":"Orientius, Saint, Commonitorium. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/ORIENT%7Ccomm%7C001","quality":"proofread"}}