{"kind":"section","lang":"la","language":"Latin","title":"Commonitorium 2.91-134","citation":"Saint Orientius, Commonitorium 2.91-134","ref":"2.91","level":null,"urn":null,"url":"https://interlinea.aeterna-institute.org/library/latin/orientius-saint/commonitorium/2.91","api":"https://interlinea.aeterna-institute.org/api/v1/library/latin/orientius-saint/commonitorium/2.91","markdown":"https://interlinea.aeterna-institute.org/library/latin/orientius-saint/commonitorium/2.91.md","author":{"name":"Saint Orientius","url":"https://interlinea.aeterna-institute.org/library/latin/orientius-saint"},"work":{"title":"Commonitorium","url":"https://interlinea.aeterna-institute.org/library/latin/orientius-saint/commonitorium","urn":"urn:cts:latinLit:stoa0215b.stoa001"},"verse":true,"words":283,"text":"Palmam nemo feret, nisi qui certauerit ante.\nNon nisi uictori blanda corona datur.\nAn tibi <si> fragiles mundi quaerantur honores,\nMunere quo speres emeruisse hominem?\nQuidquid id est uariis quod uexat corpora saeuis,\nDum celeri uitam currimus in stadio:\nContemptum pluuias frigus ieiunia rixas\nContento poteris sustinuisse animo,\nDiscurrens urbem totis lustrare diebus,\nVix media fessus nocte redire domum,\nContinuoque iterum prima consurgere luco,\nVt clausas possis primus adire fores.\nEt cum te tenuis per dura sedilia somnus\nCompulerit fessum deposuisse caput,\nIlle prior forsan qui serior adfuit ibit,\nAt tua pulsabit stulta querella notos.\nAut si lictorem tanget uox clarior, opta\nVt bene submotus nec male caesus eas.\nSed fac quod rarum est, ut uictus ianitor auro\nAc precibus tandem dicat \"adire potes\".\nIngrederis lingua blandus uultuque modestus,\nCorpore subiectus: nil tamen ista iuuant.\nOmnis honor pretii est: ibis pro pondere nummi,\nCarta seu foliis siue petes tabulis.\nNam si cessarit diues manus, irrita res est,\nEt si uerba dabis, tu quoque uerba feres.\nEn honor arrisit, quem semper in ordine mos est\nSumere sero quidem, sed posuisse cito.\nNam quod tu dederas, mox conferet alter et alter:\nQuod multi cupiunt, nemo diu tenuit.\nFac tamen ut longum durans honor inflet, agat te,\nNumquidnam finem non habiturus erit?\nFinge age mansuri signent tua nomina fastus,\nAtque tuo felix annus eat titulo:\nQuid tandem prodest, cum desinit esse, potestas?\nIn quo sentitur quod fuit atque abiit?\nEt quod paulatim succedens nesciet aetas,\nEt quod si scierit, quid tibi mercis erit?\nSed qui terreno tantum dependis honori,\nTanta nunc homines ambitione colis,\nVt domino placeas, cuius sunt omnia, Christo\nInsuper et regnum promereare dei,\nAnte feres uerum falsis, ingentia paruis,\nVilia magnificis, perdita perpetuis.","prev":{"citation":"Commonitorium 2.47-90","label":"Book 2, lines 2.47-2.90","url":"https://interlinea.aeterna-institute.org/library/latin/orientius-saint/commonitorium/2.47","api":"https://interlinea.aeterna-institute.org/api/v1/library/latin/orientius-saint/commonitorium/2.47"},"next":{"citation":"Commonitorium 2.135-180","label":"Book 2, lines 2.135-2.180","url":"https://interlinea.aeterna-institute.org/library/latin/orientius-saint/commonitorium/2.135","api":"https://interlinea.aeterna-institute.org/api/v1/library/latin/orientius-saint/commonitorium/2.135"},"credit":{"text":"Orientius, Saint, Commonitorium. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/ORIENT%7Ccomm%7C001","quality":"proofread"}}