{"kind":"section","lang":"la","language":"Latin","title":"Satires 4","citation":"Persius, Satires 4","ref":"4","level":null,"urn":"urn:cts:latinLit:phi0969.phi001.perseus-lat2:4","url":"https://interlinea.aeterna-institute.org/library/latin/persius/satires/4","api":"https://interlinea.aeterna-institute.org/api/v1/library/latin/persius/satires/4","markdown":"https://interlinea.aeterna-institute.org/library/latin/persius/satires/4.md","author":{"name":"Persius","url":"https://interlinea.aeterna-institute.org/library/latin/persius"},"work":{"title":"Satires","url":"https://interlinea.aeterna-institute.org/library/latin/persius/satires","urn":"urn:cts:latinLit:phi0969.phi001"},"verse":true,"words":342,"text":"Rem populi tractas? barbatum haec crede\nmagistrum dicere, sorbitio tollit quem dira cicutae.\nquo fretus? dic hoc, magni pupille Pericli,\nscilicet ingenium et rerum prudentia velox\nante pilos venit, dicenda tacendave calles.\nergo ubi commota fervet plebecula bile,\nfert animus calidae fecisse silentia turbae\nmaiestate manus, quid deinde loquere? Quirites,\nhoc puta non iustum est; illud male,rectius illud.\nscis etenim iustum gemina suspendere lance\nancipitis librae, rectum discernis ubi inter\ncurva subit vel cum fallit pede regula varo,\net potis es nigrum vitio praefigere theta.\nquin tu igitur, summa nequiquam pelle decorus,\nante diem blando caudam iactare popello\ndesinis, Anticyras melior sorbere meracas?\nQuae tibi summa boni est? uncta vixisse patella\nsemper et adsiduo curata cuticula sole?\nexpecta, haut aliud respondeat haec anus. i nunc,\nDinomaches ego sum, suffla, sum candidus. esto,\ndum ne deterius sapiat pannucia Baucis,\ncum bene discincto cantavcrit ocima vernae.\nVt nemo in sese temptat descendere, nemo,\nsed praecedenti spectatur mantica tergo!\nquaesieris nostin Vettidi praedia? cuius?\ndives arat Curibus quantum non miluus errat.\nhunc ais, hunc dis iratis genioque sinistro,\nqui, quandoque iugum perfusa ad compita figit,\nseriolae veterem metuens deradere limum,\ningemit hoc bene sit tunicatum cum sale mordens\ncaepe, et farrata pueris plaudentibus olla\npannosam faecem morientis sorbet aceti?\nat si unctus cesses et figas in cute solem,\nest prope te ignotus, cubito qui tangat et acre\ndespuat: hi mores! penemque arcanaque lumbi\nruncantem populo marcentis pandere vulvas!\ntunc cum maxillis balanatum gausape pectas,\ninguinibus quare detonsus gurgulio extat?\nquinque palaestritae licet haec plantaria vellant\nelixasque nates labefactent forcipe adunca,\nnon tamen ista filix ullo mansuescit aratro.’\nCaedimus inque vicem pracbemus crura sagittis,\nvivitur hoc pacto, sic novimus, ilia subter\ncaecum vulnus habes, sed lato balteus auro\npraetegit. ut mavis, da verba et decipe nervos,\nsi potes. Egregium cum me vicinia dicat,\nnon credam? viso si palles, inprobe, nummo,\nsi facis in penem quidquid tibi venit, amarum\nsi puteal multa cautus vibice flagellas,\nnequiquam populo bibulas donaveris aures.\nrespue quod non es, tollat sua munera cerdo;\ntecum habita: notis quam sit tibi curta supellex.","prev":{"citation":"Satires 3.86-118","label":"Lines 3.86-3.118","url":"https://interlinea.aeterna-institute.org/library/latin/persius/satires/3.86","api":"https://interlinea.aeterna-institute.org/api/v1/library/latin/persius/satires/3.86"},"next":{"citation":"Satires 5.1-46","label":"Lines 5.1-5.46","url":"https://interlinea.aeterna-institute.org/library/latin/persius/satires/5.1","api":"https://interlinea.aeterna-institute.org/api/v1/library/latin/persius/satires/5.1"},"credit":{"text":"Persius, Satires, ed. G. G. Ramsay. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi0969/phi001/phi0969.phi001.perseus-lat2.xml","quality":"proofread"}}