{"kind":"section","lang":"la","language":"Latin","title":"Satiricon Liber 1.101-151","citation":"Petronius, Satiricon Liber 1.101-151","ref":"1.101","level":null,"urn":null,"url":"https://interlinea.aeterna-institute.org/library/latin/petronius/satiricon-liber/1.101","api":"https://interlinea.aeterna-institute.org/api/v1/library/latin/petronius/satiricon-liber/1.101","markdown":"https://interlinea.aeterna-institute.org/library/latin/petronius/satiricon-liber/1.101.md","author":{"name":"Petronius","url":"https://interlinea.aeterna-institute.org/library/latin/petronius"},"work":{"title":"Satiricon Liber","url":"https://interlinea.aeterna-institute.org/library/latin/petronius/satiricon-liber","urn":null},"verse":true,"words":282,"text":"Aperitur ingens antrum et obducti specus,\nqui castra caperent. Huc decenni proelio\nirata virtus abditur, stipant graves\nrecessus Danai et in voto latent.\nO patria, pulsas mille credidimus rates\nsolumque bello liberum: hoc titulus fero\nincisus, hoc ad fata compositus Sinon\nfirmabat et mendacium in damnum potens.\nIam turba portis libera ac bello carens\nin vota properat. Fletibus manant genae,\nmentisque pavidae gaudium lacrimas habet.\nQuas metus abegit. Namque Neptuno sacer\ncrinem solutus omne Laocoon replet\nclamore vulgus. Mox reducta cuspide\nuterum notavit, fata sed tardant manus,\nictusque resilit et dolis addit fidem.\nIterum tamen confirmat invalidam manum\naltaque bipenni latera pertemptat. Fremit\ncaptiva pubes intus, et dum murmurat,\nroborea moles spirat alieno metu.\nIbat iuventus capta, dum Troiam capit,\nbellumque totum fraude ducebat nova.\nEcce alia monstra: celsa qua Tenedos mare\ndorso replevit, tumida consurgunt freta\nundaque resultat scissa tranquillo minor,\nqualis silenti nocte remorum sonus\nlonge refertur, cum premunt classes mare\npulsumque marmor abiete imposita gemit.\nRespicimus: angues orbibus geminis ferunt\nad saxa fluctus, tumida quorum pectora\nrates ut altae lateribus spumas agunt.\nDat cauda sonitum, liberae ponto iubae\nconsentiunt luminibus, fulmineum iubar\nincendit aequor sibilisque undae tremunt.\nStupuere mentes. Infulis stabant sacri\nPhrygioque cultu gemina nati pignora\nLauconte. Quos repente tergoribus ligant\nangues corusci. Parvulas illi manus\nad ora referunt, neuter auxilio sibi,\nuterque fratri; transtulit pietas vices\nmorsque ipsa miseros mutuo perdit metu.\nAccumulat ecce liberum funus parens,\ninfirmus auxiliator. Invadunt virum\niam morte pasti membraque ad terram trahunt.\nIacet sacerdos inter aras victima\nterramque plangit. Sic profanatis sacris\nperitura Troia perdidit primum deos.\nIam plena Phoebe candidum extulerat iubar\nminora ducens astra radianti face,\ncum inter sepultos Priamidas nocte et mero\nDanai relaxant claustra et effundunt viros.","prev":{"citation":"Satiricon Liber 1.257-100","label":"Lines 1.257-1.100","url":"https://interlinea.aeterna-institute.org/library/latin/petronius/satiricon-liber/1.257","api":"https://interlinea.aeterna-institute.org/api/v1/library/latin/petronius/satiricon-liber/1.257"},"next":{"citation":"Satiricon Liber 1.152-327","label":"Lines 1.152-1.327","url":"https://interlinea.aeterna-institute.org/library/latin/petronius/satiricon-liber/1.152","api":"https://interlinea.aeterna-institute.org/api/v1/library/latin/petronius/satiricon-liber/1.152"},"credit":{"text":"Petronius, SATIRICON LIBER. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.","license":"Used with permission","licenseUrl":"https://www.thelatinlibrary.com/about.html","source":"https://www.thelatinlibrary.com/petronius1.html","quality":"proofread"}}