{"kind":"section","lang":"la","language":"Latin","title":"Satiricon Liber 1.137-159","citation":"Petronius, Satiricon Liber 1.137-159","ref":"1.137","level":null,"urn":null,"url":"https://interlinea.aeterna-institute.org/library/latin/petronius/satiricon-liber/1.137","api":"https://interlinea.aeterna-institute.org/api/v1/library/latin/petronius/satiricon-liber/1.137","markdown":"https://interlinea.aeterna-institute.org/library/latin/petronius/satiricon-liber/1.137.md","author":{"name":"Petronius","url":"https://interlinea.aeterna-institute.org/library/latin/petronius"},"work":{"title":"Satiricon Liber","url":"https://interlinea.aeterna-institute.org/library/latin/petronius/satiricon-liber","urn":null},"verse":true,"words":376,"text":"[LV] Comprobamus nos factum et quam in praecipiti res humanae essent, vario sermone garrimus.\"Ita, inquit Trimalchio, non oportet hunc casum sine inscriptione transire; statimque codicillos poposcit et non diu cogitatione distorta haec recitavit:\n\"Quod non expectes, ex transverso fit\net supra nos Fortuna negotia curat:\nquare da nobis vina Falerna puer.\"\nAb hoc epigrammate coepit poetarum esse mentio <. . .> diuque summa carminis penes Mopsum Thracem commorata est <. . .> donec Trimalchio: \"Rogo, inquit, magister, quid putas inter Ciceronem et Publilium interesse? Ego alterum puto disertiorem fuisse, alterum honestiorem. Quid enim his melius dici potest?\nLuxuriae ructu Martis marcent moenia.\nTuo palato clausus pavo pascitur\nplumato amictus aureo Babylonico,\ngallina tibi Numidica, tibi gallus spado.\nCiconia etiam, grata peregrina hospita\npietaticultrix, gracilipes, crotalistria,\navis exul hiemis, titulus tepidi temporis,\nnequitiae nidum in caccabo fecit modo.\nQuo margarita cara tibi, bacam Indicam?\nAn ut matrona ornata phaleris pelagiis\ntollat pedes indomita in strato extraneo?\nSmaragdum ad quam rem viridem, pretiosum vitrum?\nQuo Carchedonios optas ignes lapideos?\nNisi ut scintillet probitas e carbunculis?\nAequum est induere nuptam ventum textilem,\npalam prostare nudam in nebula linea?\n[LVI] \"Quod autem, inquit, putamus secundum litteras difficillimum esse artificium? Ego puto medicum et nummularium: medicus, qui scit quid homunciones intra praecordia sua habeant et quando febris veniat, etiam si illos odi pessime, quod mihi iubent saepe anatinam parari; nummularius, qui per argentum aes videt. Nam mutae bestiae laboriosissimae boves et oves: boves, quorum beneficio panem manducamus; oves, quod lana illae nos gloriosos faciunt. Et facinus indignum, aliquis ovillam est et tunicam habet. Apes enim ego divinas bestias puto, quae mel vomunt, etiam si dicuntur illud a Iove afferre. Ideo autem pungunt, quia ubicunque dulce est, ibi et acidum invenies.\"\nIam etiam philosophos de negotio deiciehat, cum pittacia in scypho circumferri coeperunt, puerque super hoc positus officium apophoreta recitavit. \"Argentum sceleratum\": allata est perna, supra quam acetabula erant posita. \"Cervical\": offla collaris allata est. \"Serisapia et contumelia\": <xerophagiae ex sale> datae sunt et contus cum malo. \"Porri et persica\": flagellum et cultrum accepit. \"Passeres et muscarium\": uvam passam et mel Atticum. \"Cenatoria et forensia\": offlam et tabulas accepit. \"Canale et pedale\": lepus et solea est allata. \"Muraena et littera\": murem cum rana alligatum fascemque betae accepit. Diu risimus. Sexcenta huiusmodi fuerunt, quae iam exciderunt memoriae meae.","prev":{"citation":"Satiricon Liber 1.134-136","label":"Lines 1.134-1.136","url":"https://interlinea.aeterna-institute.org/library/latin/petronius/satiricon-liber/1.134","api":"https://interlinea.aeterna-institute.org/api/v1/library/latin/petronius/satiricon-liber/1.134"},"next":{"citation":"Satiricon Liber 1.160-162","label":"Lines 1.160-1.162","url":"https://interlinea.aeterna-institute.org/library/latin/petronius/satiricon-liber/1.160","api":"https://interlinea.aeterna-institute.org/api/v1/library/latin/petronius/satiricon-liber/1.160"},"credit":{"text":"Petronius, SATIRICON LIBER. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.","license":"Used with permission","licenseUrl":"https://www.thelatinlibrary.com/about.html","source":"https://www.thelatinlibrary.com/petronius1.html","quality":"proofread"}}