{"kind":"section","lang":"la","language":"Latin","title":"Satiricon Liber 1.196-239","citation":"Petronius, Satiricon Liber 1.196-239","ref":"1.196","level":null,"urn":null,"url":"https://interlinea.aeterna-institute.org/library/latin/petronius/satiricon-liber/1.196","api":"https://interlinea.aeterna-institute.org/api/v1/library/latin/petronius/satiricon-liber/1.196","markdown":"https://interlinea.aeterna-institute.org/library/latin/petronius/satiricon-liber/1.196.md","author":{"name":"Petronius","url":"https://interlinea.aeterna-institute.org/library/latin/petronius"},"work":{"title":"Satiricon Liber","url":"https://interlinea.aeterna-institute.org/library/latin/petronius/satiricon-liber","urn":null},"verse":true,"words":286,"text":"nec satiatus erat. Gravidis freta pulsa carinis\niam peragebantur; si quis sinus abditus ultra,\nsi qua foret tellus, quae fuluum mitteret aurum,\nhostis erat, fatisque in tristia bella paratis\nquaerebantur opes. Non vulgo nota placebant\ngaudia, non usu plebeio trita voluptas.\nAes Ephyreiacum laudabat miles in unda;\nquaesitus tellure nitor certaverat ostro;\nHinc Numidae accusant, illinc nova vellera Seres\natque Arabum populus sua despoliaverat arva.\nEcce aliae clades et laesae vulnera pacis.\nQuaeritur in silvis auro fera, et ultimus Hammon\nAfrorum excutitur, ne desit belua dente\nad mortes pretiosa; fame premit advena classes,\ntigris et aurata gradiens vectatur in aula,\nut bibat humanum populo plaudente cruorem.\nHeu, pudet effari perituraque prodere fata,\nPersarum ritu male pubescentibus annis\nsurripuere viros, exsectaque viscera ferro\nin venerem fregere, atque ut fuga mobilis aevi\ncircumscripta mora properantes differat annos,\nquaerit se natura nec invenit. Omnibus ergo\nscorta placent fractique enerui corpore gressus\net laxi crines et tot nova nomina vestis,\nquaeque virum quaerunt. Ecce Afris eruta terris\ncitrea mensa greges servorum ostrumque renidens,\nponitur ac maculis imitatur vilius aurum\nquae sensum trahat. Hoc sterile ac male nobile lignum\nturba sepulta mero circum venit, omniaque orbis\npraemia correptis miles vagus esurit armis.\nIngeniosa gula est. Siculo scarus aequore mersus\nad mensam vivus perducitur, atque Lucrinis\neruta litoribus vendunt conchylia cenas,\nut renovent per damna famem. Iam Phasidos unda\norbata est avibus, mutoque in litore tantum\nsolae desertis adspirant frondibus aurae.\nNec minor in Campo furor est, emptique Quirites\nad praedam strepitumque lucri suffragia vertunt.\nVenalis populus, venalis curia patrum:\nest favor in pretio. Senibus quoque libera virtus\nexciderat, sparsisque opibus conversa potestas\nipsaque maiestas auro corrupta iacebat.\nPellitur a populo victus Cato; tristior ille est,\nqui vicit, fascesque pudet rapuisse Catoni.","prev":{"citation":"Satiricon Liber 1.416-195","label":"Lines 1.416-1.195","url":"https://interlinea.aeterna-institute.org/library/latin/petronius/satiricon-liber/1.416","api":"https://interlinea.aeterna-institute.org/api/v1/library/latin/petronius/satiricon-liber/1.416"},"next":{"citation":"Satiricon Liber 1.240-287","label":"Lines 1.240-1.287","url":"https://interlinea.aeterna-institute.org/library/latin/petronius/satiricon-liber/1.240","api":"https://interlinea.aeterna-institute.org/api/v1/library/latin/petronius/satiricon-liber/1.240"},"credit":{"text":"Petronius, SATIRICON LIBER. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.","license":"Used with permission","licenseUrl":"https://www.thelatinlibrary.com/about.html","source":"https://www.thelatinlibrary.com/petronius1.html","quality":"proofread"}}