{"kind":"section","lang":"la","language":"Latin","title":"Satiricon Liber 1.240-287","citation":"Petronius, Satiricon Liber 1.240-287","ref":"1.240","level":null,"urn":null,"url":"https://interlinea.aeterna-institute.org/library/latin/petronius/satiricon-liber/1.240","api":"https://interlinea.aeterna-institute.org/api/v1/library/latin/petronius/satiricon-liber/1.240","markdown":"https://interlinea.aeterna-institute.org/library/latin/petronius/satiricon-liber/1.240.md","author":{"name":"Petronius","url":"https://interlinea.aeterna-institute.org/library/latin/petronius"},"work":{"title":"Satiricon Liber","url":"https://interlinea.aeterna-institute.org/library/latin/petronius/satiricon-liber","urn":null},"verse":true,"words":298,"text":"Namque — hoc dedecoris populo morumque ruina —\nnon homo pulsus erat, sed in uno victa potestas\nRomanumque decus. Quare tam perdita Roma\nipsa sui merces erat et sine vindice praeda.\nPraeterea gemino deprensam gurgite plebem\nfaenoris inluvies ususque exederat aeris.\nNulla est certa domus, nullum sine pignore corpus,\nsed veluti tabes tacitis concepta medullis\nintra membra furens curis latrantibus errat.\nArma placent miseris, detritaque commoda luxu\nvulneribus reparantur. Inops audacia tuta est.\nHoc mersam caeno Romam somnoque iacentem\nquae poterant artes sana ratione movere,\nni furor et bellum ferroque excita libido?\n[CXX] \"Tres tulerat Fortuna duces, quos obruit omnes\narmorum strue diversa feralis Enyo.\nCrassum Parthus habet, Libyco iacet aequore Magnus,\nIulius ingratam perfudit sanguine Romam,\net quasi non posset tot tellus ferre sepulcra,\ndivisit cineres. Hos gloria reddit honores.\nEst locus exciso penitus demersus hiatu\nParthenopen inter magnaeque Dicarchidos arva,\nCocyti perfusus aqua; nam spiritus, extra\nqui furit effusus, funesto spargitur aestu.\nNon haec autumno tellus viret aut alit herbas\ncaespite laetus ager, non verno persona cantu\nmollia discordi strepitu virgulta locuntur,\nsed chaos et nigro squalentia pumice saxa\ngaudent ferali circum tumulata cupressu.\nHas inter sedes Ditis pater extulit ora\nbustorum flammis et cana sparsa favilla,\nac tali volucrem Fortunam voce lacessit:\n'Rerum humanarum divinarumque potestas,\nFors, cui nulla placet nimium secura potestas,\nquae nova semper amas et mox possessa relinquis,\necquid Romano sentis te pondere victam,\nnec posse ulterius perituram extollere molem?\nIpsa suas vires odit Romana iuventus\net quas struxit opes, male sustinet. Aspice late\nluxuriam spoliorum et censum in damna furentem.\nAedificant auro sedesque ad sidera mittunt,\nexpelluntur aquae saxis, mare nascitur arvis,\net permutata rerum statione rebellant.\nEn etiam mea regna petunt. Perfossa dehiscit\nmolibus insanis tellus, iam montibus haustis\nantra gemunt, et dum vanos lapis invenit usus,\ninferni manes caelum sperare fatentur.","prev":{"citation":"Satiricon Liber 1.196-239","label":"Lines 1.196-1.239","url":"https://interlinea.aeterna-institute.org/library/latin/petronius/satiricon-liber/1.196","api":"https://interlinea.aeterna-institute.org/api/v1/library/latin/petronius/satiricon-liber/1.196"},"next":{"citation":"Satiricon Liber 1.288-334","label":"Lines 1.288-1.334","url":"https://interlinea.aeterna-institute.org/library/latin/petronius/satiricon-liber/1.288","api":"https://interlinea.aeterna-institute.org/api/v1/library/latin/petronius/satiricon-liber/1.288"},"credit":{"text":"Petronius, SATIRICON LIBER. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.","license":"Used with permission","licenseUrl":"https://www.thelatinlibrary.com/about.html","source":"https://www.thelatinlibrary.com/petronius1.html","quality":"proofread"}}