{"kind":"section","lang":"la","language":"Latin","title":"Satiricon Liber 1.288-334","citation":"Petronius, Satiricon Liber 1.288-334","ref":"1.288","level":null,"urn":null,"url":"https://interlinea.aeterna-institute.org/library/latin/petronius/satiricon-liber/1.288","api":"https://interlinea.aeterna-institute.org/api/v1/library/latin/petronius/satiricon-liber/1.288","markdown":"https://interlinea.aeterna-institute.org/library/latin/petronius/satiricon-liber/1.288.md","author":{"name":"Petronius","url":"https://interlinea.aeterna-institute.org/library/latin/petronius"},"work":{"title":"Satiricon Liber","url":"https://interlinea.aeterna-institute.org/library/latin/petronius/satiricon-liber","urn":null},"verse":true,"words":284,"text":"Quare age, Fors, muta pacatum in proelia vultum,\nRomanosque cie, ac nostris da funera regnis.\nIam pridem nullo perfundimus ora cruore,\nnec mea Tisiphone sitientis perluit artus,\nex quo Sullanus bibit ensis et horrida tellus\nextulit in lucem nutritas sanguine fruges.'\n[CXXI] \"Haec ubi dicta dedit, dextrae coniungere dextram\nconatus, rupto tellurem soluit hiatu.\nTunc Fortuna levi defudit pectore voces:\n'O genitor, cui Cocyti penetralia parent,\nsi modo vera mihi fas est impune profari,\nvota tibi cedent; nec enim minor ira rebellat\npectore in hoc leviorque exurit flamma medullas.\nOmnia, quae tribui Romanis arcibus, odi\nmuneribusque meis irascor. Destruet istas\nidem, qui posuit, moles deus. Et mihi cordi\nquippe cremare viros et sanguine pascere luxum.\nCerno equidem gemina iam stratos morte Philippos\nThessaliaeque rogos et funera gentis Hiberae.\nIam fragor armorum trepidantes personat aures,\nEt Libyae cerno tua, Nile, gementia claustra,\nActiacosque sinus et Apollinis arma timentes.\nPande, age, terrarum sitientia regna tuarum\natque animas accerse novas. Vix navita Porthmeus\nsufficiet simulacra virum traducere cumba;\nclasse opus est. Tuque ingenti satiare ruina,\npallida Tisiphone, concisaque vulnera mande:\nad Stygios manes laceratus ducitur orbis.'\n[CXXII] \"Vixdum finierat, cum fulgure rupta corusco\nintremuit nubes elisosque abscidit ignes.\nSubsedit pater umbrarum, gremioque reducto,\ntelluris pavitans fraternos palluit ictus.\nContinuo clades hominum venturaque damna\nauspiciis patuere deum. Namque ore cruento\ndeformis Titan vultum caligine texit:\nciviles acies iam tum spirare putares.\nParte alia plenos extinxit Cynthia vultus\net lucem sceleri subduxit. Rupta tonabant\nverticibus lapsis montis iuga, nec vaga passim\nflumina per notas ibant morientia ripas.\nArmorum strepitu caelum furit et tuba Martem\nsideribus tremefacta ciet, iamque Aetna voratur\nignibus insolitis, et in aethera fulmina mittit.\nEcce inter tumulos atque ossa carentia bustis\numbrarum facies diro stridore minantur.","prev":{"citation":"Satiricon Liber 1.240-287","label":"Lines 1.240-1.287","url":"https://interlinea.aeterna-institute.org/library/latin/petronius/satiricon-liber/1.240","api":"https://interlinea.aeterna-institute.org/api/v1/library/latin/petronius/satiricon-liber/1.240"},"next":{"citation":"Satiricon Liber 1.335-378","label":"Lines 1.335-1.378","url":"https://interlinea.aeterna-institute.org/library/latin/petronius/satiricon-liber/1.335","api":"https://interlinea.aeterna-institute.org/api/v1/library/latin/petronius/satiricon-liber/1.335"},"credit":{"text":"Petronius, SATIRICON LIBER. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.","license":"Used with permission","licenseUrl":"https://www.thelatinlibrary.com/about.html","source":"https://www.thelatinlibrary.com/petronius1.html","quality":"proofread"}}