{"kind":"section","lang":"la","language":"Latin","title":"Satiricon Liber 1.335-378","citation":"Petronius, Satiricon Liber 1.335-378","ref":"1.335","level":null,"urn":null,"url":"https://interlinea.aeterna-institute.org/library/latin/petronius/satiricon-liber/1.335","api":"https://interlinea.aeterna-institute.org/api/v1/library/latin/petronius/satiricon-liber/1.335","markdown":"https://interlinea.aeterna-institute.org/library/latin/petronius/satiricon-liber/1.335.md","author":{"name":"Petronius","url":"https://interlinea.aeterna-institute.org/library/latin/petronius"},"work":{"title":"Satiricon Liber","url":"https://interlinea.aeterna-institute.org/library/latin/petronius/satiricon-liber","urn":null},"verse":true,"words":283,"text":"Fax stellis comitata novis incendia ducit,\nsanguineoque recens descendit Iuppiter imbre.\nHaec ostenta brevi soluit deus. Exuit omnes\nquippe moras Caesar, vindictaeque actus amore\nGallica proiecit, civilia sustulit arma.\n\"Alpibus aeriis, ubi Graio numine pulsae\ndescendunt rupes et se patiuntur adiri,\nest locus Herculeis aris sacer: hunc nive dura\nclaudit hiemps canoque ad sidera vertice tollit.\nCaelum illinc cecidisse putes: non solis adulti\nmansuescit radiis, non verni temporis aura,\nsed glacie concreta rigent hiemisque pruinis:\ntotum ferre potest umeris minitantibus orbem.\nHaec ubi calcavit Caesar iuga milite laeto\noptavitque locum, summo de vertice montis\nHesperiae campos late prospexit, et ambas\nintentans cum voce manus ad sidera dixit:\n'Iuppiter omnipotens, et tu, Saturnia tellus,\narmis laeta meis olimque onerata triumphis,\ntestor ad has acies invitum arcessere Martem,\ninvitas me ferre manus. Sed vulnere cogor,\npulsus ab urbe mea, dum Rhenum sanguine tingo,\ndnm Gallos iterum Capitolia nostra petentes\nAlpibus excludo, vincendo certior exul.\nSanguine Germano sexagintaque triumphis\nesse nocens coepi. Quamquam quos gloria terret,\naut qui sunt qui bella vident? Mercedibus emptae\nac viles operae, quorum est mea Roma noverca.\nAt reor, haud impune, nec hanc sine vindice dextram\nvinciet ignavus. Victores ite furentes,\nite mei comites, et causam dicite ferro.\nIamque omnes unum crimen vocat, omnibus una\nimpendet clades. Reddenda est gratia vobis,\nnon solus vici. Quare, quia poena tropaeis\nimminet, et sordes meruit victoria nostra,\niudice Fortuna cadat alea. Sumite bellum\net temptate manus. Certe mea causa peracta est:\ninter tot fortes armatus nescio vinci.'\nHaec ubi personuit, de caelo Delphicus ales\nomina laeta dedit pepulitque meatibus auras.\nNec non horrendi nemoris de parte sinistra\ninsolitae voces flamma sonuere sequenti.\nIpse nitor Phoebi vulgato laetior orbe\ncrevit, et aurato praecinxit fulgure vultus.","prev":{"citation":"Satiricon Liber 1.288-334","label":"Lines 1.288-1.334","url":"https://interlinea.aeterna-institute.org/library/latin/petronius/satiricon-liber/1.288","api":"https://interlinea.aeterna-institute.org/api/v1/library/latin/petronius/satiricon-liber/1.288"},"next":{"citation":"Satiricon Liber 1.379-424","label":"Lines 1.379-1.424","url":"https://interlinea.aeterna-institute.org/library/latin/petronius/satiricon-liber/1.379","api":"https://interlinea.aeterna-institute.org/api/v1/library/latin/petronius/satiricon-liber/1.379"},"credit":{"text":"Petronius, SATIRICON LIBER. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.","license":"Used with permission","licenseUrl":"https://www.thelatinlibrary.com/about.html","source":"https://www.thelatinlibrary.com/petronius1.html","quality":"proofread"}}