{"kind":"section","lang":"la","language":"Latin","title":"Satiricon Liber 1.379-424","citation":"Petronius, Satiricon Liber 1.379-424","ref":"1.379","level":null,"urn":null,"url":"https://interlinea.aeterna-institute.org/library/latin/petronius/satiricon-liber/1.379","api":"https://interlinea.aeterna-institute.org/api/v1/library/latin/petronius/satiricon-liber/1.379","markdown":"https://interlinea.aeterna-institute.org/library/latin/petronius/satiricon-liber/1.379.md","author":{"name":"Petronius","url":"https://interlinea.aeterna-institute.org/library/latin/petronius"},"work":{"title":"Satiricon Liber","url":"https://interlinea.aeterna-institute.org/library/latin/petronius/satiricon-liber","urn":null},"verse":true,"words":284,"text":"[CXXIII] \"Fortior ominibus movit Mavortia signa\nCaesar, et insolitos gressu prior occupat ausus.\nPrima quidem glacies et cana vincta pruina\nnon pugnavit humus mitique horrore quievit.\nSed postquam turmae nimbos fregere ligatos\net pavidus quadrupes undarum vincula rupit,\nincalvere nives. Mox flumina montibus altis\nundabant modo nata, sed haec quoque — iussa putares —\nstabant, et vincta fluctus stupuere ruina,\net paulo ante lues iam concidenda iacebat.\nTum vero male fida prius vestigia lusit\ndecepitque pedes; pariter turmaeque virique\narmaque congesta strue deplorata iacebant.\nEcce etiam rigido concussae flamine nubes\nexonerabantur, nec rupti turbine venti\nderant, aut tumida confractum grandine caelum.\nIpsae iam nubes ruptae super arma cadebant,\net concreta gelu ponti velut unda ruebat.\nVicta erat ingenti tellus nive victaque caeli\nsidera, victa suis haerentia flumina ripis:\nnondum Caesar erat; sed magnam nixus in hastam\nhorrida securis frangebat gressibus arva,\nqualis Caucasea decurrens arduus arce\nAmphitryoniades, aut torvo Iuppiter ore,\ncum se verticibus magni demisit Olympi\net periturorum deiecit tela Gigantum.\n\"Dum Caesar tumidas iratus deprimit arces,\ninterea volucer molis conterrita pinnis\nFama volat summique petit iuga celsa Palati,\natque hoc Romano tonitru ferit omnia signa:\niam classes fluitare mari totasque per Alpes\nfervere Germano perfusas sanguine turmas.\nArma, cruor, caedes, incendia totaque bella\nante oculos volitant. Ergo pulsata tumultu\npectora perque duas scinduntur territa causas.\nHuic fuga per terras, illi magis unda probatur,\net patria pontus iam tutior. Est magis arma\nqui temptare velit fatisque iubentibus uti.\nQuantum quisque timet, tantum fugit. Ocior ipse\nhos inter motus populus, miserable visu,\nquo mens icta iubet, deserta ducitur urbe.\nGaudet Roma fuga, debellatique Quirites\nrumoris sonitu maerentia tecta relinquunt.\nIlle manu pavida natos tenet, ille penates\noccultat gremio deploratumque relinquit\nlimen, et absentem votis interficit hostem.","prev":{"citation":"Satiricon Liber 1.335-378","label":"Lines 1.335-1.378","url":"https://interlinea.aeterna-institute.org/library/latin/petronius/satiricon-liber/1.335","api":"https://interlinea.aeterna-institute.org/api/v1/library/latin/petronius/satiricon-liber/1.335"},"next":{"citation":"Satiricon Liber 1.425-473","label":"Lines 1.425-1.473","url":"https://interlinea.aeterna-institute.org/library/latin/petronius/satiricon-liber/1.425","api":"https://interlinea.aeterna-institute.org/api/v1/library/latin/petronius/satiricon-liber/1.425"},"credit":{"text":"Petronius, SATIRICON LIBER. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.","license":"Used with permission","licenseUrl":"https://www.thelatinlibrary.com/about.html","source":"https://www.thelatinlibrary.com/petronius1.html","quality":"proofread"}}