{"kind":"section","lang":"la","language":"Latin","title":"Satiricon Liber 1.425-473","citation":"Petronius, Satiricon Liber 1.425-473","ref":"1.425","level":null,"urn":null,"url":"https://interlinea.aeterna-institute.org/library/latin/petronius/satiricon-liber/1.425","api":"https://interlinea.aeterna-institute.org/api/v1/library/latin/petronius/satiricon-liber/1.425","markdown":"https://interlinea.aeterna-institute.org/library/latin/petronius/satiricon-liber/1.425.md","author":{"name":"Petronius","url":"https://interlinea.aeterna-institute.org/library/latin/petronius"},"work":{"title":"Satiricon Liber","url":"https://interlinea.aeterna-institute.org/library/latin/petronius/satiricon-liber","urn":null},"verse":true,"words":311,"text":"Sunt qui coniugibus maerentia pectora iungant,\ngrandaevosque patres onerisque ignara iuventus.\nId pro quo metuit, tantum trahit. Omnia secum\nhic vehit imprudens praedamque in proelia ducit:\nac velut ex alto cum magnus inhorruit auster\net pulsas evertit aquas, non arma ministris,\nnon regumen prodest, ligat alter pondera pinus,\nalter tuta sinus tranquillaque litora quaerit:\nhic dat vela fugae Fortunaeque omnia credit.\nQuid tam parva queror? Gemino cum consule Magnus\nille tremor Ponti saevique repertor Hydaspis\net piratarum scopulus, modo quem ter ovantem\nIuppiter horruerat, quem tracto gurgite Pontus\net veneratus erat submissa Bosporos unda,\npro pudor! imperii deserto nomine fugit,\nut Fortuna levis Magni quoque terga videret.\n[CXXIV] \"Ergo tanta lues divum quoque numina vidit\nconsensitque fugae caeli timor. Ecce per orbem\nmitis turba deum terras exosa furentes\ndeserit, atque hominum damnatum avertitur agmen.\nPax prima ante alias niveos pulsata lacertos\nabscondit galea victum caput, atque relicto\norbe fugax Ditis petit implacabile regnum.\nHuic comes it submissa Fides, et crine soluto\nIustitia, ac maerens lacera Concordia palla.\nAt contra, sedes Erebi qua rupta dehiscit,\nemergit late Ditis chorus, horrida Erinys,\net Bellona minax, facibusque armata Megaera,\nLetumque, Insidiaeque, et lurida Mortis imago.\nQuas inter Furor, abruptis ceu liber habenis,\nsanguineum late tollit caput, oraque mille\nvulneribus confossa cruenta casside velat;\nhaeret detritus laevae Mavortius umbo\ninnumerabilibus telis gravis, atque flagranti\nstipite dextra minax terris incendia portat.\nSentit terra deos, mutataque sidera pondus\nquaesivere suum; namque omnis regia caeli\nin partes diducta ruit. Primumque Dione\nCaesaris acta sui ducit, comes additur illi\nPallas, et ingentem quatiens Mavortius hastam.\nMagnum cum Phoebo soror et Cyllenia proles\nexcipit, ac totis similis Tirynthius actis.\nIntremuere tubae, ac scisso Discordia crine\nextulit ad superos Stygium caput. Huius in ore\nconcretus sanguis, contusaque lumina flebant,\nstabant aerati scabra rubigine dentes,\ntabo lingua fluens, obsessa draconibus ora,\natque inter torto laceratam pectore vestem\nsanguineam tremula quatiebat lampada dextra.","prev":{"citation":"Satiricon Liber 1.379-424","label":"Lines 1.379-1.424","url":"https://interlinea.aeterna-institute.org/library/latin/petronius/satiricon-liber/1.379","api":"https://interlinea.aeterna-institute.org/api/v1/library/latin/petronius/satiricon-liber/1.379"},"next":{"citation":"Satiricon Liber 1.474-716","label":"Lines 1.474-1.716","url":"https://interlinea.aeterna-institute.org/library/latin/petronius/satiricon-liber/1.474","api":"https://interlinea.aeterna-institute.org/api/v1/library/latin/petronius/satiricon-liber/1.474"},"credit":{"text":"Petronius, SATIRICON LIBER. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.","license":"Used with permission","licenseUrl":"https://www.thelatinlibrary.com/about.html","source":"https://www.thelatinlibrary.com/petronius1.html","quality":"proofread"}}