{"kind":"section","lang":"la","language":"Latin","title":"Satiricon Liber 1.474-716","citation":"Petronius, Satiricon Liber 1.474-716","ref":"1.474","level":null,"urn":null,"url":"https://interlinea.aeterna-institute.org/library/latin/petronius/satiricon-liber/1.474","api":"https://interlinea.aeterna-institute.org/api/v1/library/latin/petronius/satiricon-liber/1.474","markdown":"https://interlinea.aeterna-institute.org/library/latin/petronius/satiricon-liber/1.474.md","author":{"name":"Petronius","url":"https://interlinea.aeterna-institute.org/library/latin/petronius"},"work":{"title":"Satiricon Liber","url":"https://interlinea.aeterna-institute.org/library/latin/petronius/satiricon-liber","urn":null},"verse":true,"words":435,"text":"Haec ut Cocyti tenebras et Tartara liquit,\nalta petit gradiens iuga nobilis Appennini,\nunde omnes terras atque omnia litora posset\naspicere ac toto fluitantes orbe catervas,\natque has erumpit furibundo pectore voces:\n'Sumite nunc gentes accensis mentibus arma,\nsumite et in medias immittite lampadas urbes.\nVincetur, quicumque latet; non femina cesset,\nnon puer aut aevo iam desolata senectus;\nipsa tremat tellus lacerataque tecta rebellent.\nTu legem, Marcelle, tene. Tu concute plebem,\nCurio. Tu fortem ne supprime, Lentule, Martem.\nQuid porro tu, dive, tuis cunctaris in armis,\nnon frangis portas, non muris oppida solvis\nthesaurosque rapis? Nescis tu, Magne, tueri\nRomanas arces? Epidamni moenia quaere,\nThessalicosque sinus humano sanguine tingue.'\n\"Factum est in terris quicquid Discordia iussit.\"\nCum haec Eumolpos ingenti volubilitate verborum effudisset, tandem Crotona intravimus. Vbi quidem parvo deversorio refecti, postero die amplioris fortunae domum quaerentes incidimus in turbam heredipetarum sciscitantium quod genus hominum. aut unde veniremus. Ex praescripto ergo consilii communis exaggerata verborum volubilitate, unde aut qui essemus haud dubie credentibus indicavimus. Qui statim opes suas summo cum certamine in Eumolpium congesserunt. <. . .>\n[CXXV] Dum haec magno tempore Crotone aguntur <. . .> et Eumolpus felicitate plenus prioris fortunae esset oblitus statum, adeo ut suis iactaret neminem gratiae suae ibi posse resistere impuneque suos, si quid deliquissent in ea urbe, beneficio amicorum laturos. Ceterum ego, etsi quotidie magis magisque superfluentibus bonis saginatum corpus impleveram, putabamque a custodia mei removisse vultum Fortunam, tamen saepius tam consuetudinem meam cogitabam quam causam, et: \"Quid, aiebam, si callidus captator exploratorem in Africam miserit mendaciumque deprehenderit nostrum? Quid, si etiam mercennarius praesenti felicitate lassus indicium ad amicos detulerit, totamque fallaciam invidiosa proditione detexerit? Nempe rursus fugiendum erit, et tandem expugnata paupertas nova mendicitate revocanda. Dii deaeque, quam male est extra legem viventibus! quicquid meruerunt, semper expectant\". <. . .>\n[CXXVI] CHRYSIS ANCILLA CIRCES AD POLYAENVM: \"Quia nosti venerem tuam, superbiam captas vendisque amplexus, non commodas. Quo enim spectant flexae pectine comae, quo facies medicamine attrita et oculorum quoque mollis petulantia; quo incessus arte compositus et ne vestigia quidem pedum extra mensuram aberrantia, nisi quod formam prostituis ut vendas? Vides me: nec auguria novi nec mathematicorum caelum curare soleo; ex vultibus tamen hominum mores colligo, et cum spatiantem vidi, quid cogites scio. Sive ergo nobis vendis quod peto, mercator paratus est, sive, quod humanius est, commodas, effice ut beneficium debeam. Nam quod servum te et humilem fateris, accendis desiderium aestuantis. Quaedam enim feminae sordibus calent, nec libidinem concitant, nisi aut servos viderint aut statores altius cinctos. Arena aliquas accendit, aut perfusus pulvere mulio, aut histrio scaenae ostentatione traductus. Ex hac nota domina est mea; usque ab orchestra quattuordecim transilit, et in extrema plebe quaerit quod diligat.\"","prev":{"citation":"Satiricon Liber 1.425-473","label":"Lines 1.425-1.473","url":"https://interlinea.aeterna-institute.org/library/latin/petronius/satiricon-liber/1.425","api":"https://interlinea.aeterna-institute.org/api/v1/library/latin/petronius/satiricon-liber/1.425"},"next":{"citation":"Satiricon Liber 1.717-725","label":"Lines 1.717-1.725","url":"https://interlinea.aeterna-institute.org/library/latin/petronius/satiricon-liber/1.717","api":"https://interlinea.aeterna-institute.org/api/v1/library/latin/petronius/satiricon-liber/1.717"},"credit":{"text":"Petronius, SATIRICON LIBER. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.","license":"Used with permission","licenseUrl":"https://www.thelatinlibrary.com/about.html","source":"https://www.thelatinlibrary.com/petronius1.html","quality":"proofread"}}