{"kind":"section","lang":"la","language":"Latin","title":"Satiricon Liber 1.519-529","citation":"Petronius, Satiricon Liber 1.519-529","ref":"1.519","level":null,"urn":null,"url":"https://interlinea.aeterna-institute.org/library/latin/petronius/satiricon-liber/1.519","api":"https://interlinea.aeterna-institute.org/api/v1/library/latin/petronius/satiricon-liber/1.519","markdown":"https://interlinea.aeterna-institute.org/library/latin/petronius/satiricon-liber/1.519.md","author":{"name":"Petronius","url":"https://interlinea.aeterna-institute.org/library/latin/petronius"},"work":{"title":"Satiricon Liber","url":"https://interlinea.aeterna-institute.org/library/latin/petronius/satiricon-liber","urn":null},"verse":true,"words":278,"text":"Has inter ludebat aquis errantibus amnis\nspumeus, et querulo vexabat rore lapillos.\nDignus amore locus: testis silvestris aedon\natque urbana Procne, quae circum gramina fusae\net molles violas cantu sua rura colebant.\n<. . .> Premebat illa resoluta marmoreis cervicibus aureum torum myrtoque florenti quietum <aera> verberabat. Itaque ut me vidit, paululum erubuit, hesternae scilicet iniuriae memor; deinde ut remotis omnibus secundum invitantem consedi, ramum super oculos meos posuit et quasi pariete interiecto audacior facta: \"Quid est, inquit, paralytice? Ecquid hodie totus venisti? — Rogas, inquam ego, potius quam temptas?\" Totoque corpore in amplexum eius immissus non praecantatis usque ad satietatem osculis fruor. <. . .>\n[CXXXII] [ENCOLPIVS DE ENDYMIONE PVERO: Ipsa corporis pulchritudine me ad se vocante trahebat ad venerem. Iam pluribus osculis labra crepitabant, iam implicitae manus omne genus amoris invenerant, iam alligata mutuo ambitu corpora animarum quoque mixturam fecerant.]\nManifestis matrona contumeliis verberata tandem ad ultionem decurrit, vocatque cubicularios et me iubet cato rigari. Nec contenta mulier tam gravi iniuria mea, convocat omnes quasillarias familiaeque sordidissimam partem, ac me conspui iubet. Oppono ego manus oculis meis, nullisque effusis precibus, quia sciebam quid meruissem, verberibus sputisque extra ianuam eiectus sum. Eicitur et Proselenos, Chrysis vapulat, totaque familia tristis inter se mussat, quaeritque quis dominae hilaritatem confuderit. <. . .> Itaque pensatis vicibus animosior, verberum notas arte contexi, ne aut Eumolpus contumelia mea hilarior fieret aut tristior Giton. Quod solum igitur salvo pudore poterat contingere, languorem simulavi, conditusque lectulo totum ignem furoris in eam converti, quae mihi omnium malorum causa fuerat:\nTer corripui terribilem manu bipennem,\nter languidior coliculi repente thyrso\nferrum timui, quod trepido male dabat usum.\nNec iam poteram, quod modo conficere libebat;\nnamque illa metu frigidior rigente bruma\nconfugerat in viscera mille operta rugis.","prev":{"citation":"Satiricon Liber 1.750-518","label":"Lines 1.750-1.518","url":"https://interlinea.aeterna-institute.org/library/latin/petronius/satiricon-liber/1.750","api":"https://interlinea.aeterna-institute.org/api/v1/library/latin/petronius/satiricon-liber/1.750"},"next":{"citation":"Satiricon Liber 1.530-783","label":"Lines 1.530-1.783","url":"https://interlinea.aeterna-institute.org/library/latin/petronius/satiricon-liber/1.530","api":"https://interlinea.aeterna-institute.org/api/v1/library/latin/petronius/satiricon-liber/1.530"},"credit":{"text":"Petronius, SATIRICON LIBER. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.","license":"Used with permission","licenseUrl":"https://www.thelatinlibrary.com/about.html","source":"https://www.thelatinlibrary.com/petronius1.html","quality":"proofread"}}