{"kind":"section","lang":"la","language":"Latin","title":"Satiricon Liber 1.530-783","citation":"Petronius, Satiricon Liber 1.530-783","ref":"1.530","level":null,"urn":null,"url":"https://interlinea.aeterna-institute.org/library/latin/petronius/satiricon-liber/1.530","api":"https://interlinea.aeterna-institute.org/api/v1/library/latin/petronius/satiricon-liber/1.530","markdown":"https://interlinea.aeterna-institute.org/library/latin/petronius/satiricon-liber/1.530.md","author":{"name":"Petronius","url":"https://interlinea.aeterna-institute.org/library/latin/petronius"},"work":{"title":"Satiricon Liber","url":"https://interlinea.aeterna-institute.org/library/latin/petronius/satiricon-liber","urn":null},"verse":true,"words":304,"text":"Ita non potui supplicio caput aperire,\nsed furciferae mortifero timore lusus\nad verba, magis quae poterant nocere, fugi.\nErectus igitur in cubitum hac fere oratione contumacem vexavi: \"Quid dicis, inquam, omnium hominum deorumque pudor? Nam ne nominare quidem te inter res serias fas est. Hoc de te merui, ut me in caelo positum ad inferos traheres? ut traduceres annos primo florentes vigore, senectaeque ultimae mihi lassitudinem imponere? Rogo te, mihi apodixin defunctoriam redde.\" Haec ut iratus effudi, Illa solo fixos oculos aversa tenebat, nec magis incepto vultum sermone movetur quam lentae salices lassove papavera collo. Nec minus ego tam foeda obiurgatione finita paenitentiam agere sermonis mei coepi secretoque rubore perfundi, quod oblitus verecundiae meae cum ea parte corporis verba contulerim, quam ne ad cognitionem quidem admittere severioris notae homines solerent. Mox perfricata diutius fronte: \"Quid autem ego, inquam, mali feci, si dolorem meum naturali convicio exoneravi? Aut quid est quod in corpore humano ventri male dicere solemus aut gulae capitique etiam, cum saepius dolet? Quid? Non et Vlixes cum corde litigat suo, et quidam tragici oculos suos tanquam audientes castigant? Podagrici pedibus suis male dicunt, chiragrici manibus, lippi oculis, et qui offenderunt saepe digitos, quicquid doloris habent, in pedes deferunt:\nQuid me constricta spectatis fronte Catone,\ndamnatisque novae simplicitatis opus?\nSermonis puri non tristis gratia ridet,\nquodque facit populus, candida lingua refert.\nNam quis concubitus, Veneris quis gaudia nescit?\nQuia vetat in tepido membra calere toro?\nIpse pater veri doctus Epicurus in arte\niussit, et hoc vitam dixit habere telos .\nNihil est hominum inepta persuasione falsius nec ficta severitate ineptius\".\n[CXXXIII] Hac declamatione finita Gitona voco et: \"Narra mihi, inquam, frater, sed tua fide: ea nocte, qua te mihi Ascyltos subduxit, usque in iniuriam vigilavit, an contentus fuit vidua pudicaque nocte?\" Tetigit puer oculos suos, conceptissimisque iuravit verbis sibi ab Ascylto nullam vim factam.","prev":{"citation":"Satiricon Liber 1.519-529","label":"Lines 1.519-1.529","url":"https://interlinea.aeterna-institute.org/library/latin/petronius/satiricon-liber/1.519","api":"https://interlinea.aeterna-institute.org/api/v1/library/latin/petronius/satiricon-liber/1.519"},"next":{"citation":"Satiricon Liber 1.784-804","label":"Lines 1.784-1.804","url":"https://interlinea.aeterna-institute.org/library/latin/petronius/satiricon-liber/1.784","api":"https://interlinea.aeterna-institute.org/api/v1/library/latin/petronius/satiricon-liber/1.784"},"credit":{"text":"Petronius, SATIRICON LIBER. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.","license":"Used with permission","licenseUrl":"https://www.thelatinlibrary.com/about.html","source":"https://www.thelatinlibrary.com/petronius1.html","quality":"proofread"}}