{"kind":"section","lang":"la","language":"Latin","title":"Satiricon Liber 1.558-580","citation":"Petronius, Satiricon Liber 1.558-580","ref":"1.558","level":null,"urn":null,"url":"https://interlinea.aeterna-institute.org/library/latin/petronius/satiricon-liber/1.558","api":"https://interlinea.aeterna-institute.org/api/v1/library/latin/petronius/satiricon-liber/1.558","markdown":"https://interlinea.aeterna-institute.org/library/latin/petronius/satiricon-liber/1.558.md","author":{"name":"Petronius","url":"https://interlinea.aeterna-institute.org/library/latin/petronius"},"work":{"title":"Satiricon Liber","url":"https://interlinea.aeterna-institute.org/library/latin/petronius/satiricon-liber","urn":null},"verse":true,"words":284,"text":"Quicquid in orbe vides, paret mihi. Florida tellus,\ncum volo, spissatis arescit languida sucis,\ncum volo, fundit opes, scopulique atque horrida saxa\nNiliacas iaculantur aquas. Mihi pontus inertes\nsubmittit fluctus, zephyrique tacentia ponunt\nante meos sua flabra pedes. Mihi flumina parent\nHyrcanaeque tigres et iussi stare dracones.\nQuid leviora loquor? Lunae descendit imago\ncarminibus deducta meis, trepidusque furentes\nflectere Phoebus equos revoluto cogitur orbe.\nTantum dicta valent. Taurorum flamma quiescit\nvirgineis extincta sacris, Phoebeia Circe\ncarminibus magicis socios mutavit Vlixis,\nProteus esse solet quicquid libet. Hic ego callens\nartibus Idaeos frutices in gurgite sistam,\net rursus fluvios in summo vertice ponam.\"\n[CXXXV] lnhorrui ego tam fabulosa pollicitatione conterritus, anumque inspicere diligentius coepi.\n\"Ergo, exclamat Oenothea, imperio parete!\" detersisque curiose manibus inclinavit se in lectulum ac me semel iterumque basiavit. <. . .>\nOenothea mensam veterem posuit in medio altari, quam vivis implevit carbonibus, et camellam etiam vetustate ruptam pice temperata refecit. Tum clavum, qui detrahentem secutus cum camella lignea fuerat, fumoso parieti reddidit. Mox incincta quadrato pallio cucumam ingentem foco apposuit, simulque pannum de carnario detulit furca, in quo faba erat ad usum reposita et sincipitis vetustissima particula mille plagis dolata. Vt soluit ergo licio pannum, partem leguminis super mensam effudit iussitque me diligenter purgare. Servio ego imperio, granaque sordidissimis putaminibus vestita curiosa manu segrego. At illa inertiam meam accusans improba tollit, dentibusque folliculos pariter spoliat, atque in terram veluti muscarum imagines despuit.\nMirabar equidem paupertatis ingenium singularumque rerum quasdam artes:\nNon Indum fulgebat ebur, quod inhaeserat auro,\nnec iam calcato radiabat marmore terra\nmuneribus delusa suis, sed crate saligna\nimpositum Cereris vacuae nemus et nova terrae\npocula, quae facili vilis rota finxerat actu.\nHinc molli stillae lacus et de caudice lento\nvimineae lances maculataque testa Lyaeo.","prev":{"citation":"Satiricon Liber 1.784-804","label":"Lines 1.784-1.804","url":"https://interlinea.aeterna-institute.org/library/latin/petronius/satiricon-liber/1.784","api":"https://interlinea.aeterna-institute.org/api/v1/library/latin/petronius/satiricon-liber/1.784"},"next":{"citation":"Satiricon Liber 1.581-848","label":"Lines 1.581-1.848","url":"https://interlinea.aeterna-institute.org/library/latin/petronius/satiricon-liber/1.581","api":"https://interlinea.aeterna-institute.org/api/v1/library/latin/petronius/satiricon-liber/1.581"},"credit":{"text":"Petronius, SATIRICON LIBER. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.","license":"Used with permission","licenseUrl":"https://www.thelatinlibrary.com/about.html","source":"https://www.thelatinlibrary.com/petronius1.html","quality":"proofread"}}