{"kind":"section","lang":"la","language":"Latin","title":"Satiricon Liber 1.784-804","citation":"Petronius, Satiricon Liber 1.784-804","ref":"1.784","level":null,"urn":null,"url":"https://interlinea.aeterna-institute.org/library/latin/petronius/satiricon-liber/1.784","api":"https://interlinea.aeterna-institute.org/api/v1/library/latin/petronius/satiricon-liber/1.784","markdown":"https://interlinea.aeterna-institute.org/library/latin/petronius/satiricon-liber/1.784.md","author":{"name":"Petronius","url":"https://interlinea.aeterna-institute.org/library/latin/petronius"},"work":{"title":"Satiricon Liber","url":"https://interlinea.aeterna-institute.org/library/latin/petronius/satiricon-liber","urn":null},"verse":true,"words":362,"text":"<. . .> positoque in limine genu sic deprecatus sum numen aversum:\nNympharum Bacchique comes, quem pulcra Dione\ndivitibus silvis numen dedit, inclita paret\ncui Lesbos viridisque Thasos, quem Lydus adorat\nseptifluus, templumque tuis imponit Hypaepis:\nhuc aedes et Bacchi tutor Dryadumque voluptas,\net timidas admitte preces. Non sanguine tristi\nperfusus venio, non templis impius hostis\nadmovi dextram, sed inops et rebus egenis\nattritus facinus non toto corpore feci.\nQuisquis peccat inops, minor est reus. Hac prece, quaeso,\nexonera mentem culpaeque ignosce minori,\net quandoque mihi fortunae arriserit hora,\nnon sine honore tuum patiar decus. Ibit ad aras,\nSancte, tuas hircus, pecoris pater; ibit ad aras\ncorniger et querulae fetus suis, hostia lactens.\nSpumabit pateris hornus liquor, et ter ovantem\ncirca delubrum gressum feret ebria pubes.\"\nDum haec ago curaque sollerti deposito meo caveo, intravit delubrum anus laceratis crinibus nigraque veste deformis, extraque vestibulum me iniecta manu duxit. <. . .>\n[CXXXIV] PROSELENOS ANVS AD ENCOLPIVM: \"Quae striges comederunt nervos tuos, aut quod purgamentum nocte calcasti trivio aut cadaver? Nec a puero quidem te vindicasti, sed mollis, debilis, lassus, tanquam caballus in clivo et operam et sudorem perdidisti. Nec contentus ipse peccare, mihi deos iratos excitasti\".\nAc me iterum in cellam sacerdotis nihil recusantem perduxit impulitque super lectum, et harundinem ab ostio rapuit iterumque nihil respondentem mulcavit. Ac nisi primo ictu harundo quassata impetum verberantis minuisset, forsitan etiam brachia mea caputque fregisset. Ingemui ego utique propter mascarpionem, lacrimisque ubertim manantibus obscuratum dextra caput super pulvinum inclinavi. Nec minus illa fletu confusa altera parte lectuli sedit aetatisque longae moram tremulis vocibus coepit accusare, donec intervenit sacerdos: \"Quid vos, inquit, in cellam meam tanquam ante recens bustum venistis? Vtique die feriarum, quo etiam lugentes rident.\" PROSELENOS AD OENOTHEAN SACERDOTEM PRIAPI: \"O, inquit, Oenothea, hunc adulescentem quem vides, malo astro natus est; nam neque puero neque puellae bona sua vendere potest. Nunquam tu hominem tam infelicem vidisti: lorum in aqua, non inguina habet. Ad summam, qualem putas esse, qui de Circes toro sine voluptate surrexit?\" His auditis Oenothea inter utrumque consedit, motoque diutius capite: \"Istum, inquit, morbum sola sum quae emendare scio. Et ne putetis perplexe agere, rogo ut adulescentulus tuus mecum nocte dormiat, nisi illud tam rigidum reddidero quam cornu:","prev":{"citation":"Satiricon Liber 1.530-783","label":"Lines 1.530-1.783","url":"https://interlinea.aeterna-institute.org/library/latin/petronius/satiricon-liber/1.530","api":"https://interlinea.aeterna-institute.org/api/v1/library/latin/petronius/satiricon-liber/1.530"},"next":{"citation":"Satiricon Liber 1.558-580","label":"Lines 1.558-1.580","url":"https://interlinea.aeterna-institute.org/library/latin/petronius/satiricon-liber/1.558","api":"https://interlinea.aeterna-institute.org/api/v1/library/latin/petronius/satiricon-liber/1.558"},"credit":{"text":"Petronius, SATIRICON LIBER. Text: The Latin Library (thelatinlibrary.com), used with permission. Changes: HTML markup removed and the text divided into reading sections by Interlinea.","license":"Used with permission","licenseUrl":"https://www.thelatinlibrary.com/about.html","source":"https://www.thelatinlibrary.com/petronius1.html","quality":"proofread"}}