{"kind":"section","lang":"la","language":"Latin","title":"Appendix Perottina 10","citation":"Phaedrus, Appendix Perottina 10","ref":"10","level":null,"urn":null,"url":"https://interlinea.aeterna-institute.org/library/latin/phaedrus/appendix-perottina/10","api":"https://interlinea.aeterna-institute.org/api/v1/library/latin/phaedrus/appendix-perottina/10","markdown":"https://interlinea.aeterna-institute.org/library/latin/phaedrus/appendix-perottina/10.md","author":{"name":"Phaedrus","url":"https://interlinea.aeterna-institute.org/library/latin/phaedrus"},"work":{"title":"Appendix Perottina","url":"https://interlinea.aeterna-institute.org/library/latin/phaedrus/appendix-perottina","urn":null},"verse":true,"words":201,"text":"Magni Pompeii miles uasti corporis\nFracte loquendo et ambulando molliter\nFamam cinaedi traxerat certissimi.\nHic insidiatus nocte iumentis ducis\nCum ueste et auro et magno argenti pondere\nAuertit mulos. factum rumor dissipat;\nArguitur miles, rapitur in praetorium.\nTum Magnus: \"Quid ais? tune me, commilito,\nSpoliare es ausus?\" ille continuo excreat\nSibi in sinistram et sputum digitis dissipat:\n\"Sic, imperator, oculi extillescant mei,\nSi uidi aut tetigi.\" tum uir animi simplicis\nId dedecus castrorum propelli iubet,\nNec cadere in illum credit tantam audaciam.\nBreue tempus intercessit, et fidens manu\nVnum de nostris prouocabat barbarus.\nSibi quisque metuit; primi iam mussant duces.\nTandem cinaedus habitu, sed Mars uiribus\nAdit sedentem pro tribunali ducem,\nEt uoce molli: \"Licet?\" eum uero eici,\nVt in re atroci, Magnus stomachans imperat.\nTum quidam senior ex amicis principis:\n\"Hunc ego committi satius fortunae arbitror,\nIn quo iactura leuis est, quam fortem uirum,\nQui casu uictus temeritatis te arguat.\"\nAssensit Magnus et permisit militi\nProdire contra; qui mirante exercitu\nDicto celerius hostis abscidit caput,\nVictorque rediit. his tunc Pompeius super:\n\"Corona, miles, equidem te dono libens,\nQuia uindicasti laudem Romani imperi;\nSed extillescant oculi sic\" inquit \"mei,\"\nTurpe illud imitans ius iurandum militis,\n\"Nisi tu abstulisti sarcinas nuper meas.\"","prev":{"citation":"Appendix Perottina 9","label":"Poem 9","url":"https://interlinea.aeterna-institute.org/library/latin/phaedrus/appendix-perottina/9","api":"https://interlinea.aeterna-institute.org/api/v1/library/latin/phaedrus/appendix-perottina/9"},"next":{"citation":"Appendix Perottina 11","label":"Poem 11","url":"https://interlinea.aeterna-institute.org/library/latin/phaedrus/appendix-perottina/11","api":"https://interlinea.aeterna-institute.org/api/v1/library/latin/phaedrus/appendix-perottina/11"},"credit":{"text":"Phaedrus, Appendix Perottina. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PHAEDR%7Cappe%7C001","quality":"proofread"}}