{"kind":"section","lang":"la","language":"Latin","title":"Appendix Perottina 15","citation":"Phaedrus, Appendix Perottina 15","ref":"15","level":null,"urn":null,"url":"https://interlinea.aeterna-institute.org/library/latin/phaedrus/appendix-perottina/15","api":"https://interlinea.aeterna-institute.org/api/v1/library/latin/phaedrus/appendix-perottina/15","markdown":"https://interlinea.aeterna-institute.org/library/latin/phaedrus/appendix-perottina/15.md","author":{"name":"Phaedrus","url":"https://interlinea.aeterna-institute.org/library/latin/phaedrus"},"work":{"title":"Appendix Perottina","url":"https://interlinea.aeterna-institute.org/library/latin/phaedrus/appendix-perottina","urn":null},"verse":true,"words":165,"text":"Per aliquot annos quaedam dilectum uirum\nAmisit et sarcophago corpus condidit;\nA quo reuelli nullo cum posset modo\nEt in sepulchro lugens uitam degeret,\nClaram assecuta est famam castae coniugis.\nInterea fanum qui compilarant Iouis,\nCruci suffixi luerunt poenas numini.\nHorum reliquias ne quis posset tollere,\nCustodes dantur milites cadauerum,\nMonumentum iuxta, mulier quo se incluserat.\nAliquando sitiens unus de custodibus\nAquam rogauit media nocte ancillulam,\nQuae forte dominae tunc adsistebat suae\nDormitum eunti; namque lucubrauerat\nEt usque in serum uigilias perduxerat.\nPaulum reclusis foribus miles prospicit,\nVidetque egregiam facie pulchra feminam.\nCorreptus animus ilico succenditur\nOriturque sensim ut impotentis cupiditas.\nSollers acumen mille causas inuenit,\nPer quas uidere posset uiduam saepius.\nCotidiana capta consuetudine\nPaulatim facta est aduenae submissior,\nMox artior reuinxit animum copula.\nHic dum consumit noctes custos diligens,\nDesideratum est corpus ex una cruce.\nTurbatus miles factum exponit mulieri.\nAt sancta mulier \"Non est quod timeas\" ait,\nVirique corpus tradit figendum cruci,\nNe subeat ille poenas neglegentiae.\nSic turpitudo laudis obsedit locum.","prev":{"citation":"Appendix Perottina 14","label":"Poem 14","url":"https://interlinea.aeterna-institute.org/library/latin/phaedrus/appendix-perottina/14","api":"https://interlinea.aeterna-institute.org/api/v1/library/latin/phaedrus/appendix-perottina/14"},"next":{"citation":"Appendix Perottina 16","label":"Poem 16","url":"https://interlinea.aeterna-institute.org/library/latin/phaedrus/appendix-perottina/16","api":"https://interlinea.aeterna-institute.org/api/v1/library/latin/phaedrus/appendix-perottina/16"},"credit":{"text":"Phaedrus, Appendix Perottina. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PHAEDR%7Cappe%7C001","quality":"proofread"}}