{"kind":"section","lang":"la","language":"Latin","title":"Appendix Perottina 16","citation":"Phaedrus, Appendix Perottina 16","ref":"16","level":null,"urn":null,"url":"https://interlinea.aeterna-institute.org/library/latin/phaedrus/appendix-perottina/16","api":"https://interlinea.aeterna-institute.org/api/v1/library/latin/phaedrus/appendix-perottina/16","markdown":"https://interlinea.aeterna-institute.org/library/latin/phaedrus/appendix-perottina/16.md","author":{"name":"Phaedrus","url":"https://interlinea.aeterna-institute.org/library/latin/phaedrus"},"work":{"title":"Appendix Perottina","url":"https://interlinea.aeterna-institute.org/library/latin/phaedrus/appendix-perottina","urn":null},"verse":true,"words":177,"text":"Vnam expetebant uirginem iuuenes duo.\nVicit locuples genus et formam pauperis.\nVt nuptiarum dictus aduenit dies,\nAmans, dolorem quia non poterat perpeti,\nMaerens propinquos contulit se in hortulos,\nQuos ultra paulo uilla splendens diuitis\nErat acceptura uirginem e matris sinu,\nParum ampla in urbe uisa quod fuerat domus.\nPompa explicatur, turba concurrit frequens,\nEt coniugalem praefert Hymenaeus facem.\nAsellus autem, qui solebat pauperi\nQuaestum deferre, stabat portae in limine.\nIllum puellae casu conducunt sui,\nViae labores teneros ne laedant pedes.\nRepente caelum, Veneris misericordia,\nVentis mouetur, intonat mundi fragor\nNoctemque densis horridam nimbis parat.\nLux rapitur oculis, et simul uis grandinis\nEffusa trepidos passim comites dissipat,\nSibi quemque cogens petere praesidium fuga.\nAsellus notum proxime tectum subit,\nEt uoce magna sese uenisse indicat.\nProcurrunt pueri, pulchram aspiciunt uirginem\nEt admirantur; deinde domino nuntiant.\nInter sodales ille paucos accubans\nAmorem crebris auocabat poculis.\nVbi nuntiatum est, recreatus gaudiis\nHortante Baccho et Venere, dulcis perficit\nAequalitatis inter plausus nuptias.\nQuaerunt parentes per praeconem filiam;\nNouus maritus coniuge amissa dolet.\nQuid esset actum postquam populo innotuit,\nOmnes fauorem comprobarunt caelitum.","prev":{"citation":"Appendix Perottina 15","label":"Poem 15","url":"https://interlinea.aeterna-institute.org/library/latin/phaedrus/appendix-perottina/15","api":"https://interlinea.aeterna-institute.org/api/v1/library/latin/phaedrus/appendix-perottina/15"},"next":{"citation":"Appendix Perottina 17","label":"Poem 17","url":"https://interlinea.aeterna-institute.org/library/latin/phaedrus/appendix-perottina/17","api":"https://interlinea.aeterna-institute.org/api/v1/library/latin/phaedrus/appendix-perottina/17"},"credit":{"text":"Phaedrus, Appendix Perottina. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PHAEDR%7Cappe%7C001","quality":"proofread"}}