{"kind":"section","lang":"la","language":"Latin","title":"Appendix Perottina 4","citation":"Phaedrus, Appendix Perottina 4","ref":"4","level":null,"urn":null,"url":"https://interlinea.aeterna-institute.org/library/latin/phaedrus/appendix-perottina/4","api":"https://interlinea.aeterna-institute.org/api/v1/library/latin/phaedrus/appendix-perottina/4","markdown":"https://interlinea.aeterna-institute.org/library/latin/phaedrus/appendix-perottina/4.md","author":{"name":"Phaedrus","url":"https://interlinea.aeterna-institute.org/library/latin/phaedrus"},"work":{"title":"Appendix Perottina","url":"https://interlinea.aeterna-institute.org/library/latin/phaedrus/appendix-perottina","urn":null},"verse":true,"words":95,"text":"Mercurium hospitio mulieres olim duae\nInliberali et sordido receperant;\nQuarum una in cunis paruum habebat filium,\nQuaestus placebat alteri meretricius.\nErgo ut referret gratiam officiis parem,\nAbiturus et iam limen excedens ait:\n\"Deum uidetis; tribuam uobis protinus\nQuod quaeque optarit.\" mater suppliciter rogat\nBarbatum ut uideat natum quam primum suum;\nMoecha ut sequatur sese quidquid tetigerit.\nVolat Mercurius, intro redeunt mulieres.\nBarbatus infans, ecce, uagitus ciet.\nId forte meretrix cum rideret ualidius,\nNares repleuit umor ut fieri solet.\nEmungere igitur se uolens prendit manu\nTraxitque ad terram nasi longitudinem,\nEt aliam ridens ipsa ridenda extitit.","prev":{"citation":"Appendix Perottina 3","label":"Poem 3","url":"https://interlinea.aeterna-institute.org/library/latin/phaedrus/appendix-perottina/3","api":"https://interlinea.aeterna-institute.org/api/v1/library/latin/phaedrus/appendix-perottina/3"},"next":{"citation":"Appendix Perottina 5","label":"Poem 5","url":"https://interlinea.aeterna-institute.org/library/latin/phaedrus/appendix-perottina/5","api":"https://interlinea.aeterna-institute.org/api/v1/library/latin/phaedrus/appendix-perottina/5"},"credit":{"text":"Phaedrus, Appendix Perottina. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PHAEDR%7Cappe%7C001","quality":"proofread"}}