{"kind":"section","lang":"la","language":"Latin","title":"Appendix Perottina 5","citation":"Phaedrus, Appendix Perottina 5","ref":"5","level":null,"urn":null,"url":"https://interlinea.aeterna-institute.org/library/latin/phaedrus/appendix-perottina/5","api":"https://interlinea.aeterna-institute.org/api/v1/library/latin/phaedrus/appendix-perottina/5","markdown":"https://interlinea.aeterna-institute.org/library/latin/phaedrus/appendix-perottina/5.md","author":{"name":"Phaedrus","url":"https://interlinea.aeterna-institute.org/library/latin/phaedrus"},"work":{"title":"Appendix Perottina","url":"https://interlinea.aeterna-institute.org/library/latin/phaedrus/appendix-perottina","urn":null},"verse":true,"words":121,"text":"Olim Prometheus saeculi figulus noui\nCura subtili Veritatem fecerat,\nVt iura posset inter homines reddere.\nSubito accersitus nuntio magni Iouis\nCommendat officinam fallaci Dolo,\nIn disciplinam nuper quem receperat.\nHic studio accensus, facie simulacrum pari,\nVna statura, simile et membris omnibus,\nDum tempus habuit callida finxit manu.\nQuod prope iam totum mire cum positum foret,\nLutum ad faciendos illi defecit pedes.\nRedit magister, quo festinanter Dolus\nMetu turbatus in suo sedit loco.\nMirans Prometheus tantam similitudinem\nPropriae uideri uoluit artis gloriam.\nIgitur fornaci pariter duo signa intulit;\nQuibus percoctis atque infuso spiritu\nModesto gressu sancta incessit Veritas,\nAt trunca species haesit in uestigio.\nTunc falsa imago atque operis furtiui labor\nMendacium appellatum est, quod negantibus\nPedes habere facile et ipse adsentio.","prev":{"citation":"Appendix Perottina 4","label":"Poem 4","url":"https://interlinea.aeterna-institute.org/library/latin/phaedrus/appendix-perottina/4","api":"https://interlinea.aeterna-institute.org/api/v1/library/latin/phaedrus/appendix-perottina/4"},"next":{"citation":"Appendix Perottina 6","label":"Poem 6","url":"https://interlinea.aeterna-institute.org/library/latin/phaedrus/appendix-perottina/6","api":"https://interlinea.aeterna-institute.org/api/v1/library/latin/phaedrus/appendix-perottina/6"},"credit":{"text":"Phaedrus, Appendix Perottina. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PHAEDR%7Cappe%7C001","quality":"proofread"}}