{"kind":"section","lang":"la","language":"Latin","title":"Fables 14","citation":"Phaedrus, Fables 14","ref":"14","level":null,"urn":"urn:cts:latinLit:phi0975.phi001.perseus-lat2:14","url":"https://interlinea.aeterna-institute.org/library/latin/phaedrus/fables/14","api":"https://interlinea.aeterna-institute.org/api/v1/library/latin/phaedrus/fables/14","markdown":"https://interlinea.aeterna-institute.org/library/latin/phaedrus/fables/14.md","author":{"name":"Phaedrus","url":"https://interlinea.aeterna-institute.org/library/latin/phaedrus"},"work":{"title":"Fables","url":"https://interlinea.aeterna-institute.org/library/latin/phaedrus/fables","urn":"urn:cts:latinLit:phi0975.phi001"},"verse":true,"words":177,"text":"Unam expetebant virginem iuvenes duo;\nVicit locuples genus et formam pauperis.\nUt nuptiarum dictus advenit dies,\nAmans dolorem quia non poterat perpeti,\nMaerens propinquos contulit se in hortulos,\nQuos ultra paulo villa splendida divitis\nErat acceptura virginem e matris sinu,\nParum ampla in urbe visa quod fuerat domus.\nPompa explicatur, turba concurrit frequens,\nEt coniugalem praebet Hymenaeus facem.\nAsellus autem, qui solebat pauperi\nQuaestum referre, stabat portae in limine.\nIllum puellae casu conducunt suae,\nViae labores teneros ne laedant pedes.\nRepente caelum, Veneris misericordia,\nVentis movetur, intonat mundi fragor\nNoctemque densis horridam nimbis parat:\nLux rapitur oculis et simul vis grandinis\nEffusa trepidos passim comites dissipat,\nSibi quemque cogens petere praesidium fuga.\nAsellus notum proximum tectum subit\nEt voce magna sese venisse indicat.\nProcurrunt pueri, pulchram aspiciunt virginem\nEt admirantur: deinde domino nuntiant.\nInter sodales ille paucos accubans\nAmorem crebris avocabat poculis.\nUbi nuntiatum est, recreatus gaudiis\nHortante Baccho et Venere, dulces perficit\nAequalitatis inter plausus nuptias.\nQuaerunt parentes per praeconem filiam;\nNovus maritus coniuge amissa dolet.\nQuid esset actum postquam populo innotuit,\nOmnes favorem comprobarunt caelitum.","prev":{"citation":"Fables 13","label":"Poem 13","url":"https://interlinea.aeterna-institute.org/library/latin/phaedrus/fables/13","api":"https://interlinea.aeterna-institute.org/api/v1/library/latin/phaedrus/fables/13"},"next":{"citation":"Fables 15","label":"Poem 15","url":"https://interlinea.aeterna-institute.org/library/latin/phaedrus/fables/15","api":"https://interlinea.aeterna-institute.org/api/v1/library/latin/phaedrus/fables/15"},"credit":{"text":"Phaedrus, Fables, ed. Lucian Mueller. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi0975/phi001/phi0975.phi001.perseus-lat2.xml","quality":"proofread"}}