{"kind":"section","lang":"la","language":"Latin","title":"Fables 15","citation":"Phaedrus, Fables 15","ref":"15","level":null,"urn":"urn:cts:latinLit:phi0975.phi001.perseus-lat2:15","url":"https://interlinea.aeterna-institute.org/library/latin/phaedrus/fables/15","api":"https://interlinea.aeterna-institute.org/api/v1/library/latin/phaedrus/fables/15","markdown":"https://interlinea.aeterna-institute.org/library/latin/phaedrus/fables/15.md","author":{"name":"Phaedrus","url":"https://interlinea.aeterna-institute.org/library/latin/phaedrus"},"work":{"title":"Fables","url":"https://interlinea.aeterna-institute.org/library/latin/phaedrus/fables","urn":"urn:cts:latinLit:phi0975.phi001"},"verse":true,"words":94,"text":"Aesopus turpi cum serviret feminae,\nQuae se expingendo totum intricaret diem,\nVestem, uniones, aurum, argentum sumeret,\nNec inveniret digito qui se tangeret:\nLicetne paucis? inquit—Dicas.—Censeo,\nQuidvis efficies, cultum si deposueris.—\nAdeone per me videor tibi meliuscula?—\nImmo, nisi dederis, sponda cessabit tua.\n—At non cessabunt latera respondit tua,\nEt obiurgari iussit servum garrulum.\nPost paulo armillam tollit fur argenteam.\nEam non apparere ut dictum est mulieri,\nFurore plena vocat omnes et verbera\nProponit gravia, verum si non dixerint.\nAliis minare inquit me non falles, era;\nFlagris sum caesus, verum quia dixi modo.","prev":{"citation":"Fables 14","label":"Poem 14","url":"https://interlinea.aeterna-institute.org/library/latin/phaedrus/fables/14","api":"https://interlinea.aeterna-institute.org/api/v1/library/latin/phaedrus/fables/14"},"next":{"citation":"Fables 16","label":"Poem 16","url":"https://interlinea.aeterna-institute.org/library/latin/phaedrus/fables/16","api":"https://interlinea.aeterna-institute.org/api/v1/library/latin/phaedrus/fables/16"},"credit":{"text":"Phaedrus, Fables, ed. Lucian Mueller. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi0975/phi001/phi0975.phi001.perseus-lat2.xml","quality":"proofread"}}