{"kind":"section","lang":"la","language":"Latin","title":"Fables 18","citation":"Phaedrus, Fables 18","ref":"18","level":null,"urn":"urn:cts:latinLit:phi0975.phi001.perseus-lat2:18","url":"https://interlinea.aeterna-institute.org/library/latin/phaedrus/fables/18","api":"https://interlinea.aeterna-institute.org/api/v1/library/latin/phaedrus/fables/18","markdown":"https://interlinea.aeterna-institute.org/library/latin/phaedrus/fables/18.md","author":{"name":"Phaedrus","url":"https://interlinea.aeterna-institute.org/library/latin/phaedrus"},"work":{"title":"Fables","url":"https://interlinea.aeterna-institute.org/library/latin/phaedrus/fables","urn":"urn:cts:latinLit:phi0975.phi001"},"verse":true,"words":115,"text":"Servus profugiens dominum naturae asperae,\nAesopo occurrit notus e vicinia.\nQuid tu confusus?—Dicam tibi clare, pater,\nHoc namque es dignus appellari nomine,\nTuto querela quia apud te deponitur.\nPlagae supersunt, desunt mihi cibaria;\nSubinde ad villam mittor sine viatico.\nDomi si cenat, totis persto noctibus,\nSive est vocatus, iaceo ad lucem in semita.\nEmerui libertatem, canus servio.\nUllius essem culpae mihi si conscius,\nAequo animo ferrem; numquam sum factus satur\nEt super infelix saevum patior dominium.\nHas propter causas et quas longum est promere,\nAbire destinavi quo tulerint pedes.\nErgo inquit audi: cum mali nil feceris,\nHaec experiris, ut refers, incommoda;\nQuid si peccaris? quae te passurum putas?\nTali consilio est a fuga deterritus.","prev":{"citation":"Fables 17","label":"Poem 17","url":"https://interlinea.aeterna-institute.org/library/latin/phaedrus/fables/17","api":"https://interlinea.aeterna-institute.org/api/v1/library/latin/phaedrus/fables/17"},"next":{"citation":"Fables 19","label":"Poem 19","url":"https://interlinea.aeterna-institute.org/library/latin/phaedrus/fables/19","api":"https://interlinea.aeterna-institute.org/api/v1/library/latin/phaedrus/fables/19"},"credit":{"text":"Phaedrus, Fables, ed. Lucian Mueller. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi0975/phi001/phi0975.phi001.perseus-lat2.xml","quality":"proofread"}}