{"kind":"section","lang":"la","language":"Latin","title":"Fables 2.epilogus","citation":"Phaedrus, Fables 2.epilogus","ref":"2.epilogus","level":null,"urn":"urn:cts:latinLit:phi0975.phi001.perseus-lat2:2.epilogus","url":"https://interlinea.aeterna-institute.org/library/latin/phaedrus/fables/2.epilogus","api":"https://interlinea.aeterna-institute.org/api/v1/library/latin/phaedrus/fables/2.epilogus","markdown":"https://interlinea.aeterna-institute.org/library/latin/phaedrus/fables/2.epilogus.md","author":{"name":"Phaedrus","url":"https://interlinea.aeterna-institute.org/library/latin/phaedrus"},"work":{"title":"Fables","url":"https://interlinea.aeterna-institute.org/library/latin/phaedrus/fables","urn":"urn:cts:latinLit:phi0975.phi001"},"verse":true,"words":106,"text":"Aesopi ingenio statuam posuere Attici\nServumque collocarunt aeterna in basi,\nPatere honoris scirent ut cuncti viam\nNec generi tribui, sed virtuti gloriam.\nQuoniam occuparat alter ne primus foret,\nNe solus esset studui; quod superfuit:\nNec haec invidia, verum est aemulatio.\nQuod si labori faverit Latium meo,\nPlures habebit, quos opponat Graeciae.\nSi livor obtrectare curam voluerit,\nNon tamen eripiet laudis conscientiam.\nSi nostrum studium ad aures pervenit tuas\nEt arte fictas animus sentit fabulas,\nOmnem querelam submovet felicitas.\nSin autem doctus illis occurrit labor,\nSinistra quos in lucem natura extulit\nNec quicquam possunt nisi meliores carpere,\nFatale exitium corde durato feram,\nDonec fortunam criminis pudeat sui.","prev":{"citation":"Fables 2.8","label":"Poem 2.8","url":"https://interlinea.aeterna-institute.org/library/latin/phaedrus/fables/2.8","api":"https://interlinea.aeterna-institute.org/api/v1/library/latin/phaedrus/fables/2.8"},"next":{"citation":"Fables 3.prologus","label":"Poem 3.prologus","url":"https://interlinea.aeterna-institute.org/library/latin/phaedrus/fables/3.prologus","api":"https://interlinea.aeterna-institute.org/api/v1/library/latin/phaedrus/fables/3.prologus"},"credit":{"text":"Phaedrus, Fables, ed. Lucian Mueller. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi0975/phi001/phi0975.phi001.perseus-lat2.xml","quality":"proofread"}}