{"kind":"section","lang":"la","language":"Latin","title":"Fables 26","citation":"Phaedrus, Fables 26","ref":"26","level":null,"urn":"urn:cts:latinLit:phi0975.phi001.perseus-lat2:26","url":"https://interlinea.aeterna-institute.org/library/latin/phaedrus/fables/26","api":"https://interlinea.aeterna-institute.org/api/v1/library/latin/phaedrus/fables/26","markdown":"https://interlinea.aeterna-institute.org/library/latin/phaedrus/fables/26.md","author":{"name":"Phaedrus","url":"https://interlinea.aeterna-institute.org/library/latin/phaedrus"},"work":{"title":"Fables","url":"https://interlinea.aeterna-institute.org/library/latin/phaedrus/fables","urn":"urn:cts:latinLit:phi0975.phi001"},"verse":true,"words":89,"text":"Cum venatorem celeri pede fugeret lepus\nEt a bubulco visus veprem irreperet:\nPer superos oro perque spes omnes tuas,\nNe me indices, bubulce; nihil umquam mali\nHuic agro feci. Et rusticus: Ne timueris;\nLate securus. Iamque venator sequens:\nQuaeso, bubulce, numquid huc venit lepus?\nVenit, sed abiit hac ad laevam; et dexteram\nDemonstrat nutu partem. Venator citus\nNon intellexit seque e conspectu abstulit.\nTunc sic bubulcus: Ecquid est gratum tibi,\nQuod te celavi? Linguae prorsus non nego\nHabere atque agere maximas me gratias;\nVerum oculis ut priveris opto perfidis.","prev":{"citation":"Fables 25","label":"Poem 25","url":"https://interlinea.aeterna-institute.org/library/latin/phaedrus/fables/25","api":"https://interlinea.aeterna-institute.org/api/v1/library/latin/phaedrus/fables/25"},"next":{"citation":"Fables 27","label":"Poem 27","url":"https://interlinea.aeterna-institute.org/library/latin/phaedrus/fables/27","api":"https://interlinea.aeterna-institute.org/api/v1/library/latin/phaedrus/fables/27"},"credit":{"text":"Phaedrus, Fables, ed. Lucian Mueller. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi0975/phi001/phi0975.phi001.perseus-lat2.xml","quality":"proofread"}}