{"kind":"section","lang":"la","language":"Latin","title":"Fables 3.epilogus","citation":"Phaedrus, Fables 3.epilogus","ref":"3.epilogus","level":null,"urn":"urn:cts:latinLit:phi0975.phi001.perseus-lat2:3.epilogus","url":"https://interlinea.aeterna-institute.org/library/latin/phaedrus/fables/3.epilogus","api":"https://interlinea.aeterna-institute.org/api/v1/library/latin/phaedrus/fables/3.epilogus","markdown":"https://interlinea.aeterna-institute.org/library/latin/phaedrus/fables/3.epilogus.md","author":{"name":"Phaedrus","url":"https://interlinea.aeterna-institute.org/library/latin/phaedrus"},"work":{"title":"Fables","url":"https://interlinea.aeterna-institute.org/library/latin/phaedrus/fables","urn":"urn:cts:latinLit:phi0975.phi001"},"verse":true,"words":195,"text":"Supersunt mihi quae scribam, sed parco sciens,\nPrimum ne videar esse tibi molestior,\nDistringit quem multarum rerum varietas;\nDein si quis eadem forte conari velit,\nHabere ut possit aliquid operis residui:\nQuamvis materiae tanta abundet copia,\nLabori faber ut desit, non fabro labor.\nBrevitati nostrae praemium ut reddas peto\nQuod es pollicitus: exhibe vocis fidem.\nNam vita morti propior est cotidie,\nEt hoc minus perveniet ad me muneris,\nQuo plus consumet temporis dilatio.\nSi cito rem perages, usus fiet longior:\nFruar diutius, si celerius coepero.\nLanguentis aevi dum sunt aliquae reliquiae,\nAuxilio locus est: olim senio debilem\nFrustra adiuvare bonitas nitetur tua,\nCum iam desierit esse beneficium utile\nEt mors vicina flagitabit debitum.\nStultum admovere tibi preces existimo,\nProclivis ultro cum sit misericordia.\nSaepe impetravit veniam confessus reus:\nQuanto innocenti iustius debet dari?\nTuae sunt partes; fuerunt aliorum prius,\nDein simili gyro venient aliorum vices.\nDecerne quod religio, quod patitur fides,\nEt graviter me tutare iudicio tuo.\nExcedit animus quem proposuit terminum;\nSed difficulter continetur spiritus,\nIntegritatis qui sincerae conscius\nA noxiorum premitur insolentiis.\nQui sint, requires; apparebunt tempore.\nEgo, quondam legi quam puer sententiam,\nPalam muttire plebeio piaculum est,\nDum sanitas constabit, pulchre meminero.","prev":{"citation":"Fables 3.19","label":"Poem 3.19","url":"https://interlinea.aeterna-institute.org/library/latin/phaedrus/fables/3.19","api":"https://interlinea.aeterna-institute.org/api/v1/library/latin/phaedrus/fables/3.19"},"next":{"citation":"Fables 4.prologus","label":"Poem 4.prologus","url":"https://interlinea.aeterna-institute.org/library/latin/phaedrus/fables/4.prologus","api":"https://interlinea.aeterna-institute.org/api/v1/library/latin/phaedrus/fables/4.prologus"},"credit":{"text":"Phaedrus, Fables, ed. Lucian Mueller. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi0975/phi001/phi0975.phi001.perseus-lat2.xml","quality":"proofread"}}