{"kind":"section","lang":"la","language":"Latin","title":"Fables 3.prologus","citation":"Phaedrus, Fables 3.prologus","ref":"3.prologus","level":null,"urn":"urn:cts:latinLit:phi0975.phi001.perseus-lat2:3.prologus","url":"https://interlinea.aeterna-institute.org/library/latin/phaedrus/fables/3.prologus","api":"https://interlinea.aeterna-institute.org/api/v1/library/latin/phaedrus/fables/3.prologus","markdown":"https://interlinea.aeterna-institute.org/library/latin/phaedrus/fables/3.prologus.md","author":{"name":"Phaedrus","url":"https://interlinea.aeterna-institute.org/library/latin/phaedrus"},"work":{"title":"Fables","url":"https://interlinea.aeterna-institute.org/library/latin/phaedrus/fables","urn":"urn:cts:latinLit:phi0975.phi001"},"verse":true,"words":364,"text":"Phaedri libellos legere si desideras,\nVaces oportet, Eutyche, a negotiis,\nUt liber animus sentiat vim carminis.\nVerum inquis tanti non est ingenium tuum,\nMomentum ut horae pereat officiis meis.\nNon ergo causa est manibus id tangi tuis,\nQuod occupatis auribus non convenit.\nFortasse dices: Aliquae venient feriae,\nQuae me soluto pectore ad studium vocent.\nLegesne, quaeso, potius viles nenias,\nImpendas curam quam rei domesticae,\nReddas amicis tempora, uxori vaces,\nAnimum relaxes, otium des corpori,\nUt assuetam fortius praestes vicem?\nMutandum tibi propositum est ut vitae genus,\nIntrare si Musarum limen cogitas.\nEgo, quem Pierio mater enixa est iugo,\nIn quo tonanti sancta Mnemosyne Iovi\nFecunda novies artium peperit chorum,\nQuamvis in ipsa paene natus sim schola\nCuramque habendi penitus corde eraserim\nEt laude invicta vitam in hanc incubuerim,\nFastidiose tamen in coetum recipior.\nQuid credis illi accidere, qui magnas opes\nExaggerare quaerit omni vigilia,\nDocto labori dulce praeponens lucrum?\nSed iam quodcumque fuerit, ut dixit Sinon,\nAd regem cum Dardaniae perductus foret,\nLibrum exarabo tertium Aesopi stilo,\nHonori et meritis dedicans illum tuis.\nQuem si leges, laetabor; sin autem minus,\nHabebunt certe quo se oblectent posteri.\nNunc fabularum cur sit inventum genus,\nBrevi docebo. Servitus obnoxia,\nQuia quae volebat non audebat dicere,\nAffectus proprios in fabellas transtulit\nCalumniamque fictis elusit iocis.\nEgo porro illius semita feci viam,\nEt cogitavi plura quam reliquerat,\nIn calamitatem deligens quaedam meam.\nQuod si accusator alius Seiano foret,\nSi testis alius, iudex alius denique,\nDignum faterer esse me tantis malis,\nNec his dolorem delenirem remediis.\nSuspicione si quis errabit sua\nEt rapiet ad se quod erit commune omnium,\nStulte nudabit animi conscientiam.\nHuic excusatum me velim nihilo minus:\nNeque enim notare singulos mens est mihi,\nVerum ipsam vitam et mores hominum ostendere.\nRem me professum dicet fors aliquis gravem.\nSi Phryx Aesopus potuit, Anacharsis Scytha\nAeternam famam condere ingenio suo:\nEgo, litteratae qui sum propior Graeciae,\nCur somno inerti deseram patriae decus?\nThreissa cum gens numeret auctores suos,\nLinoque Apollo sit parens, Musa Orpheo,\nQui saxa cantu movit et domuit feras\nHebrique tenuit impetus dulci mora.\nErgo hinc abesto, livor, ne frustra gemas,\nQuoniam mihi sollemnis debetur gloria.\nInduxi te ad legendum; sincerum mihi\nCandore noto reddas iudicium peto.","prev":{"citation":"Fables 2.epilogus","label":"Poem 2.epilogus","url":"https://interlinea.aeterna-institute.org/library/latin/phaedrus/fables/2.epilogus","api":"https://interlinea.aeterna-institute.org/api/v1/library/latin/phaedrus/fables/2.epilogus"},"next":{"citation":"Fables 3.1","label":"Poem 3.1","url":"https://interlinea.aeterna-institute.org/library/latin/phaedrus/fables/3.1","api":"https://interlinea.aeterna-institute.org/api/v1/library/latin/phaedrus/fables/3.1"},"credit":{"text":"Phaedrus, Fables, ed. Lucian Mueller. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi0975/phi001/phi0975.phi001.perseus-lat2.xml","quality":"proofread"}}