{"kind":"section","lang":"la","language":"Latin","title":"Fables 4","citation":"Phaedrus, Fables 4","ref":"4","level":null,"urn":"urn:cts:latinLit:phi0975.phi001.perseus-lat2:4","url":"https://interlinea.aeterna-institute.org/library/latin/phaedrus/fables/4","api":"https://interlinea.aeterna-institute.org/api/v1/library/latin/phaedrus/fables/4","markdown":"https://interlinea.aeterna-institute.org/library/latin/phaedrus/fables/4.md","author":{"name":"Phaedrus","url":"https://interlinea.aeterna-institute.org/library/latin/phaedrus"},"work":{"title":"Fables","url":"https://interlinea.aeterna-institute.org/library/latin/phaedrus/fables","urn":"urn:cts:latinLit:phi0975.phi001"},"verse":true,"words":121,"text":"Olim Prometheus saeculi figulus novi\nCura subtili Veritatem fecerat,\nUt iura posset inter homines reddere.\nSubito accersitus nuntio magni Iovis\nCommendat officinam fallaci Dolo,\nIn disciplinam nuper quem receperat.\nHic studio accensus, facie simulacrum pari,\nUna statura, simile et membris omnibus,\nDum tempus habuit, callida finxit manu.\nQuod prope iam totum mire cum positum foret,\nLutum ad faciendos illi defecit pedes.\nRedit magister; quo festinanter Dolus\nMetu turbatus in suo sedit loco.\nMirans Prometheus tantam similitudinem,\nPropriae videri voluit artis gloriam.\nIgitur fornaci pariter duo signa intulit;\nQuibus percoctis atque infuso spiritu,\nModesto gressu sancta incessit Veritas;\nAt trunca species haesit in vestigio.\nTunc falsa imago atque operis furtivi labor\nMendacium appellatum est; quod negantibus\nPedes habere facile et ipse assentio.","prev":{"citation":"Fables 3","label":"Poem 3","url":"https://interlinea.aeterna-institute.org/library/latin/phaedrus/fables/3","api":"https://interlinea.aeterna-institute.org/api/v1/library/latin/phaedrus/fables/3"},"next":{"citation":"Fables 5","label":"Poem 5","url":"https://interlinea.aeterna-institute.org/library/latin/phaedrus/fables/5","api":"https://interlinea.aeterna-institute.org/api/v1/library/latin/phaedrus/fables/5"},"credit":{"text":"Phaedrus, Fables, ed. Lucian Mueller. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi0975/phi001/phi0975.phi001.perseus-lat2.xml","quality":"proofread"}}