{"kind":"section","lang":"la","language":"Latin","title":"Fables 8","citation":"Phaedrus, Fables 8","ref":"8","level":null,"urn":"urn:cts:latinLit:phi0975.phi001.perseus-lat2:8","url":"https://interlinea.aeterna-institute.org/library/latin/phaedrus/fables/8","api":"https://interlinea.aeterna-institute.org/api/v1/library/latin/phaedrus/fables/8","markdown":"https://interlinea.aeterna-institute.org/library/latin/phaedrus/fables/8.md","author":{"name":"Phaedrus","url":"https://interlinea.aeterna-institute.org/library/latin/phaedrus"},"work":{"title":"Fables","url":"https://interlinea.aeterna-institute.org/library/latin/phaedrus/fables","urn":"urn:cts:latinLit:phi0975.phi001"},"verse":true,"words":200,"text":"Magni Pompei miles vasti corporis\nFracte loquendo et ambulando molliter\nFamam cinaedi traxerat certissimam.\nHic insidiatus nocte iumentis ducis,\nCum veste et auro et magno argenti pondere\nAvertit mulos. Factum rumor dissipat;\nArguitur miles, rapitur in praetorium.\nTum Magnus: Quid ais? tune me, commilito,\nSpoliare es ausus? Ille continuo exscreat\nSibi in sinistram et sputum digitis dissipat.\nSic, imperator, oculi exstillescant mei,\nSi vidi aut tetigi. Tum vir animi simplicis\nId dedecus castrorum propelli iubet,\nNec cadere in illum credit tantam audaciam.\nBreve tempus intercessit, et fidens manu\nUnum e Romanis provocabat barbarus.\nSibi quisque metuit; primi mussitant duces.\nTandem cinaedus habitu, sed Mars viribus,\nAdit sedentem pro tribunali ducem,\nEt voce molli: Licet? Enimvero eici\nVirum ut in re atroci Magnus stomachans imperat.\nTum quidam senior ex amicis principis:\nHunc ego committi satius fortunae arbitror,\nIn quo iactura levis est, quam fortem virum,\nQui casu victus temeritatis te arguat.\nAssensit Magnus et permisit militi\nProdire contra; qui mirante exercitu,\nDicto celerius hostis abscidit caput\nVictorque rediit. His tunc Pompeius super:\nCorona, miles, equidem te dono libens,\nQuia vindicasti laudem Romani imperi;\nSed exstillescant oculi sic inquit mei,\nTurpe illud imitans ius iurandum militis,\nNisi tu abstulisti sarcinas nuper meas.","prev":{"citation":"Fables 7","label":"Poem 7","url":"https://interlinea.aeterna-institute.org/library/latin/phaedrus/fables/7","api":"https://interlinea.aeterna-institute.org/api/v1/library/latin/phaedrus/fables/7"},"next":{"citation":"Fables 9","label":"Poem 9","url":"https://interlinea.aeterna-institute.org/library/latin/phaedrus/fables/9","api":"https://interlinea.aeterna-institute.org/api/v1/library/latin/phaedrus/fables/9"},"credit":{"text":"Phaedrus, Fables, ed. Lucian Mueller. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi0975/phi001/phi0975.phi001.perseus-lat2.xml","quality":"proofread"}}