{"kind":"section","lang":"la","language":"Latin","title":"Aulularia pr","citation":"Plautus, Aulularia pr","ref":"pr","level":null,"urn":"urn:cts:latinLit:phi0119.phi003.perseus-lat2:pr","url":"https://interlinea.aeterna-institute.org/library/latin/plautus/aulularia/pr","api":"https://interlinea.aeterna-institute.org/api/v1/library/latin/plautus/aulularia/pr","markdown":"https://interlinea.aeterna-institute.org/library/latin/plautus/aulularia/pr.md","author":{"name":"Plautus","url":"https://interlinea.aeterna-institute.org/library/latin/plautus"},"work":{"title":"Aulularia","url":"https://interlinea.aeterna-institute.org/library/latin/plautus/aulularia","urn":"urn:cts:latinLit:phi0119.phi003"},"verse":true,"words":269,"text":"Ne quis miretur qui sim, paucis eloquar.\nego Lar sum familiaris ex hac familia\nunde exeuntem me aspexistis. hanc domum\niam multos annos est cum possideo et colo\npatri avoque iam huius qui nunc hic habet.\nsed mí avos huius obsecrans concredidit\nthensaurum aúri clam omnis: in medio foco\ndefodit, venerans mé ut id servarem sibi.\nis quoniam moritur (ita avido ingenio fuit),\nnumquam indicare id filio voluit suo,\ninopemque optavit potius eum relinquere,\nquam eum thensaurum commonstraret filio;\nagri reliquit ei non magnum modum,\nquo cum labore magno et misere viveret.\nubi is óbiit mortem qui mihi id aurum credidit,\ncoepi observare, ecqui maiorem filius\nmihi honorem haberet quam eius habuisset pater.\natque ille vero minus minusque impendio\ncurare mínusque me impertire honoribus.\nitem a me contra factum est, nam item obiit diem.\nis ex se húnc reliquit qui hic nunc habitat filium\npariter moratum ut pater avosque huius fuit.\nhuic filia una est. ea mihi cottidie\naut ture aut vino aut aliqui semper supplicat,\ndat mihi coronas. eius honoris gratia\nfeci, thensaurum ut hic reperiret Euclio,\nquo illam facilius nuptum, si vellet, daret.\nnam eam compressit de summo adulescens loco.\nis scit adulescens quae sit quam compresserit,\nilla illum nescit, neque compressam autem pater.\neam ego hódie faciam ut hic senex de proxumo\nsibi uxórem poscat. id ea faciam gratia,\nquo ille eam facilius ducat qui compresserat.\net hic qui poscet eam sibi uxorem senex,\nis adulescentis illius est avonculus,\nqui illam stupravit noctu, Cereris vigiliis.\nsed hic senex iam clamat intus ut solet.\nanum foras extrudit, ne sit conscia.\ncredo aurum inspicere volt, ne subreptum siet.","prev":null,"next":{"citation":"Aulularia 1.1","label":"Act 1","url":"https://interlinea.aeterna-institute.org/library/latin/plautus/aulularia/1.1","api":"https://interlinea.aeterna-institute.org/api/v1/library/latin/plautus/aulularia/1.1"},"credit":{"text":"Plautus, Aulularia, ed. Friedrich Leo. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi0119/phi003/phi0119.phi003.perseus-lat2.xml","quality":"proofread"}}