{"kind":"section","lang":"la","language":"Latin","title":"Captivi pr","citation":"Plautus, Captivi pr","ref":"pr","level":null,"urn":"urn:cts:latinLit:phi0119.phi005.perseus-lat2:pr","url":"https://interlinea.aeterna-institute.org/library/latin/plautus/captivi/pr","api":"https://interlinea.aeterna-institute.org/api/v1/library/latin/plautus/captivi/pr","markdown":"https://interlinea.aeterna-institute.org/library/latin/plautus/captivi/pr.md","author":{"name":"Plautus","url":"https://interlinea.aeterna-institute.org/library/latin/plautus"},"work":{"title":"Captivi","url":"https://interlinea.aeterna-institute.org/library/latin/plautus/captivi","urn":"urn:cts:latinLit:phi0119.phi005"},"verse":true,"words":445,"text":"Hos quos videtis stare hic captivos duos,\n†illi qui astant, hi stant ambo, non sedent;\nhoc vos mihi testes estis me verum loqui.\nsenex qui hic habitat Hegio est huius pater.\nsed is quo pacto serviat suo sibi patri,\nid ego hic apud vos proloquar, si operam datis.\nseni huic fuerunt filii nati duo;\nalterum quadrimum puerum servos surpuit\neumque hínc profugiens vendidit in Alide\npatri huius. iam hoc tenetis? … optume est.\nnegát hercle ille ultimus. accedito.\nsi non ubi sedeas locus est, est ubi ambules,\nquando histrionem cogis mendicarier.\nego me tua causa, ne erres, non rupturus sum.\nvos qui potestis ope vestra censerier,\naccipite relicuom: alieno uti nil moror.\nfugitivos ille, ut dixeram ante, huius patri\ndomo quém profugiens dominum abstulerat vendidit.\nis postquam hunc emit, dedit eum huic gnato suo\npeculiarem, quia quasi una aetas erat.\nhic nunc domi sérvit suo patri, nec scit pater;\nenim véro di nos quasi pilas homines habent.\nrationem habetis, quo modo unum amiserit.\npostquam belligerant Aetoli cum Aleis,\nut fit in bello, capitur alter filius:\nmedicus Menarchus emit ibidem in Alide.\ncoepit captivos commercari hic Aleos,\nsi quem reperire possit qui mutet suom,\nillum captivom: hunc suom esse nescit, qui domist.\net quoniam heri indaudivit, de summo loco\nsummoque genere captum esse equitem Aleum,\nnil pretio parsit, filio dum parceret:\nreconciliare ut facilius posset domum,\nemít hosce e praeda ambos de quaestoribus.\nhisce autem inter sese hunc confinxerunt dolum,\nquo pacto hic servos suom erum hinc amittat domum.\nitaque inter se commutant vestem et nomina;\nillic vocatur Philocrates, hic Tyndarus:\nhuius íllic, hic illius hodie fert imaginem.\net hic hódie expediet hanc docte fallaciam,\net suom erum faciet libertatis compotem,\neodemque pacto fratrem servabit suom\nreducemque faciet liberum in patriam ad patrem,\nimprudens: itidem ut saepe iam in multis locis\nplus insciens quis fecit quam prudens boni.\nsed inscientes sua sibi fallacia\nita compararunt et confinxerunt dolum\nitaque hi commenti, de sua sententia\nut in sérvitute hic ad suom maneat patrem:\nita nunc ignorans suo sibi servit patri;\nhomunculi quanti sunt, quom recogito!\nhaec res agetur nobis, vobis fabula.\nsed etiam est, paucis vos quod monitos voluerim.\nprofecto expediet fabulae huic operam dare.\nnon pertractate facta est neque item ut ceterae:\nneque spurcidici insunt versus, immemorabiles;\nhic neque periurus leno est nec meretrix mala\nneque miles gloriosus; ne vereamini,\nquia bellum Aetolis esse dixi cum Aleis:\nforis íllic extra scaenam fient proelia.\nnam hoc paene iniquomst, comico choragio\nconari desubito agere nos tragoediam.\nproin si quis pugnam expectat, litis contrahat:\nvalentiorem nactus adversarium\nsi erit, ego faciam ut pugnam inspectet non bonam,\nadeo ut spectare postea omnis oderit.\nabeo. valete, iudices iustissimi\ndomi duellique duellatores optumi.","prev":null,"next":{"citation":"Captivi 1.1","label":"Act 1","url":"https://interlinea.aeterna-institute.org/library/latin/plautus/captivi/1.1","api":"https://interlinea.aeterna-institute.org/api/v1/library/latin/plautus/captivi/1.1"},"credit":{"text":"Plautus, Captivi, ed. Friedrich Leo. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/phi0119/phi005/phi0119.phi005.perseus-lat2.xml","quality":"proofread"}}