{"kind":"section","lang":"la","language":"Latin","title":"Cento 1-46","citation":"Proba, Cento 1-46","ref":"1","level":null,"urn":null,"url":"https://interlinea.aeterna-institute.org/library/latin/proba/cento/1","api":"https://interlinea.aeterna-institute.org/api/v1/library/latin/proba/cento/1","markdown":"https://interlinea.aeterna-institute.org/library/latin/proba/cento/1.md","author":{"name":"Proba","url":"https://interlinea.aeterna-institute.org/library/latin/proba"},"work":{"title":"Cento","url":"https://interlinea.aeterna-institute.org/library/latin/proba/cento","urn":"urn:cts:latinLit:stoa0234f.stoa001"},"verse":true,"words":299,"text":"Iam dudum temerasse duces pia foedera pacis,\nRegnandi miseros tenuit quos dira cupido,\nDiuersasque neces, regum crudelia bella\nCognatasque acies, pollutos caede parentum\nInsignis clipeos nulloque ex hoste tropaea,\nSanguine conspersos tulerat quos fama triumphos,\nInnumeris totiens uiduatas ciuibus urbes,\nConfiteor, scripsi: satis est meminisse malorum:\nNunc, deus omnipotens, sacrum, precor, accipe carmen\nAeternique tui septemplicis ora resolue\nSpiritus atque mei resera penetralia cordis,\nArcana ut possim uatis Proba cuncta referre.\nNon nunc ambrosium cura est mihi quaerere nectar,\nNec libet Aonio de uertice ducere Musas,\nNon mihi saxa loqui uanus persuadeat error\nLaurigerosque sequi tripodas et inania uota\nIurgantesque deos procerum uictosque penates:\nNullus enim labor est uerbis extendere famam\nAtque hominum studiis paruam disquirere laudem:\nCastalio sed fonte madens imitata beatos\nQuae sitiens hausi sanctae libamina lucis\nHinc canere incipiam. praesens, deus, erige mentem;\nVergilium cecinisse loquar pia munera Christi:\nRem nulli obscuram repetens ab origine pergam,\nSi qua fides animo, si uera infusa per artus\nMens agitat molem et toto se corpore miscet\nSpiritus et quantum non noxia corpora tardant\nTerrenique hebetant artus moribundaque membra.\nO pater, o hominum rerumque aeterna potestas,\nDa facilem cursum atque animis illabere nostris,\nTuque ades inceptumque una decurre laborem,\nNate, patris summi uigor et caelestis origo,\nQuem primi colimus meritosque nouamus honores,\nIam noua progenies, omnis quem credidit aetas.\nNam memini ueterum uoluens monumenta uirorum\nMusaeum ante omnes uestrum cecinisse per orbem\nQuae sint, quae fuerint, quae mox uentura trahantur.\n+ omnia et ipse tener mundi concreuerit orbis.\nFelix, qui potuit rerum cognoscere causas,\nVnde hominum pecudumque genus uitaeque uolantum\nEt quae marmoreo fert monstra sub aequore pontus,\n+ et liquidi simul ignis et caeli mobilis umor.\nHaut aliter prima crescentis origine mundi\nIlluxisse dies aliumue habuisse tenorem\nCrediderim. maior rerum mihi nascitur ordo,\nSi qua fidem tanto est operi latura uetustas.","prev":{"citation":"Cento praef","label":"Poem praef","url":"https://interlinea.aeterna-institute.org/library/latin/proba/cento/praef","api":"https://interlinea.aeterna-institute.org/api/v1/library/latin/proba/cento/praef"},"next":{"citation":"Cento 47-90","label":"Lines 47-90","url":"https://interlinea.aeterna-institute.org/library/latin/proba/cento/47","api":"https://interlinea.aeterna-institute.org/api/v1/library/latin/proba/cento/47"},"credit":{"text":"Proba, Cento. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PROBA%7Ccent%7C001","quality":"proofread"}}