{"kind":"section","lang":"la","language":"Latin","title":"Cento 136-185","citation":"Proba, Cento 136-185","ref":"136","level":null,"urn":null,"url":"https://interlinea.aeterna-institute.org/library/latin/proba/cento/136","api":"https://interlinea.aeterna-institute.org/api/v1/library/latin/proba/cento/136","markdown":"https://interlinea.aeterna-institute.org/library/latin/proba/cento/136.md","author":{"name":"Proba","url":"https://interlinea.aeterna-institute.org/library/latin/proba"},"work":{"title":"Cento","url":"https://interlinea.aeterna-institute.org/library/latin/proba/cento","urn":"urn:cts:latinLit:stoa0234f.stoa001"},"verse":true,"words":321,"text":"His demum exactis torquet qui sidera mundi\nInfit: eo dicente premit placida aequora pontus\nEt tremefacta solo tellus, silet arduus aether:\n'Viuite felices interque nitentia culta\nFortunatorum nemorum sedesque beatas.\nHaec domus, haec patria est, requies ea certa laborum.\nHis ego nec metas rerum nec tempora pono:\nImperium sine fine dedi, multosque per annos\nNon rastros patietur humus, non uinea falcem.\nAt genus immortale manet, nec tarda senectus\nDebilitat uires animi mutatque uigorem.\nVos contra quae dicam animis aduertite uestris.\nEst in conspecta ramis felicibus arbos,\nQuam neque fas igni cuiquam nec sternere ferro,\nReligione sacra numquam concessa moueri.\nHac quicumque sacros decerpserit arbore fetus,\nMorte luet merita: nec me sententia uertit.\nNec tibi tam prudens quisquam persuadeat auctor\nCommaculare manus (liceat te uoce moneri),\nFemina, nec te ullius uiolentia uincat,\nSi te digna manet diuini gloria ruris.'\nPostquam cuncta pater, caeli cui sidera parent,\nComposuit, legesque dedit camposque nitentis\nDesuper ostentat, tantarum gloria rerum.\nEcce autem primi sub limina solis et ortus\nDeuenere locos, ubi mollis amaracus illos\nFloribus et dulci aspirans complectitur umbra.\nHic uer purpureum atque alienis mensibus aestas,\nHic liquidi fontes, hic caeli tempore certo\nDulcia mella premunt, hic candida populus antro\nImminet et lentae texunt umbracula uites.\nInuitant croceis halantes floribus horti\nInter odoratum lauri nemus ipsaque tellus\nOmnia liberius nullo poscente ferebat.\nFortunati ambo, si mens non laeua fuisset\nConiugis infandae: docuit post exitus ingens.\nIamque dies infanda aderat: per florea rura\nEcce inimicus atrox immensis orbibus anguis\nSeptem ingens gyros, septena uolumina uersans\nNec uisu facilis nec dictu affabilis ulli\nObliqua inuidia ramo frondente pependit,\nVipeream spirans animam, cui tristia bella\nIraeque insidiaeque et crimina noxia cordi.\nOdit et ipse pater: tot sese uertit in ora\nArrectisque horret squamis, et, ne quid inausum\nAut intemptatum scelerisue doliue relinquat,\nSic prior aggreditur dictis seque obtulit ultro:\n'Dic' ait 'o uirgo (lucis habitamus opacis\nRiparumque toros et prata recentia riuis\nIncolimus), quae tanta animis ignauia uenit?","prev":{"citation":"Cento 91-135","label":"Lines 91-135","url":"https://interlinea.aeterna-institute.org/library/latin/proba/cento/91","api":"https://interlinea.aeterna-institute.org/api/v1/library/latin/proba/cento/91"},"next":{"citation":"Cento 186-227","label":"Lines 186-227","url":"https://interlinea.aeterna-institute.org/library/latin/proba/cento/186","api":"https://interlinea.aeterna-institute.org/api/v1/library/latin/proba/cento/186"},"credit":{"text":"Proba, Cento. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/PROBA%7Ccent%7C001","quality":"proofread"}}